"არა გვაქვს უფლება, ვიცხოვროთ ასეთ რეალობაში, ჩვენ შორის არ უნდა იდგეს უცხო ძალა"- პრემიერი აფხაზეთის ომის დაწყების თარიღს ეხმაურება

პოლიტიკა - 09:50, 14 Aug, 2017

1516

საქართველოს პრემიერ-მინისტრი აფხაზეთის ომის დაწყების 25-ე წლისთავს ეხმაურება, გიორგი კვირიკაშვილის თქმით ძმათამკვლელმა ომმა უმძიმესი შედეგები მოუტანა როგორც ქართველებს ასევე აფხაზებს. პრემიერის თქმით ქართველების და აფხაზების ერთად ცხოვრების ისტორია სამაგალითოა და მათ შორის არ უნდა იდგეს უცხო ძალა:

„14 აგვისტო ტრაგიკული დღეა ჩვენი ქვეყნის უახლეს ისტორიაში. 25 წლის წინ ვერ შევძელით ძმათამკვლელი ომის თავიდან აცილება, ჩვენსა და ჩვენს აფხაზ ძმებს შორის დაწყებულმა სისხლისღვრამ უმძიმესი შედეგები მოგვიტანა. მისი შედეგების სიმძიმე როგორც ქართველებისთვის, ისე აფხაზებისთვის დღეს კიდევ უფრო თვალსაჩინოა.

ჩვენი ერთად ცხოვრების ისტორია სამაგალითოა და არა გვაქვს უფლება, ვიცხოვროთ ასეთ რეალობაში. ჩვენ შორის არ უნდა იდგეს უცხო ძალა,

ეს საზიანოა ჩვენთვის - ქართველებისა და აფხაზებისთვის, ჩვენი შვილების მომავლისთვის.

მე დიდი იმედი მაქვს, რომ ჩვენ შევძლებთ ამ უდიდესი შეცდომის გამოსწორებას და მალე დადგება დრო, როცა დავიბრუნებთ ჩვენი აფხაზი ძმების გულებს და გავაგრძელებთ ცხოვრებას საუკუნეებგამოვლილი სიყვარულითა და ურთიერთპატივისცემით ერთიან, ძლიერ საქართველოში.“- ნათქვამია პრემიერის მიმართვაში.