ეთნიკური დისკრიმინაცია და იდენტობის შეცვლის მცდელობა - ციხელაშვილის ოკუპირებულ აფხაზეთში ახალი დოკუმენტის აღების მოთხოვნაზე

პოლიტიკა - 13:43, 13 Aug, 2017

1215

ოკუპირებულ აფხაზეთში დეფაქტო რეჟიმის მიერ რეგიონში მცხოვებლებისთვის ახალი დოკუმენტის აღების მოთხოვნას ეხმაურება საქართველოს სახელმწიფო მინისტრი შერიგებისა და სამოქალაქო თანასწორობის საკითხებში, ქეთევან ციხელაშვილი. მინისტრი აღნიშნულ გადაწყვეტილებას იდენტობის შეცვლის მიზნით, ადამიანებზე განხორციელებულ ზეწოლას უწოდებს.

„ის დოკუმენტები, რომლებსაც მოსახლეობა იყენებდა ისედაც შეზღუდული გადაადგილების შესაძლებლობისთვის, შეიძლება გაუქმდეს იმისთვის, რომ აიძულონ ისინი აიღონ ახალი ე.წ. დროებითი მოწმობები თუ ცხოვრების მოწმობები, რომლებიც უფლებრივად კიდევ დამატებით ზღუდავს მათ. ფაქტობრივად, რა სურათს ვიღებთ, როდესაც ადამიანებზე არის ზეწოლა ერთი იდენტობის შეცვლასთან დაკავშირებით, ფაქტობრივად ასე ვთქვათ გააფხაზების მცდელობა, რაც ბუნებრივია, წარმატებული ვერ იქნება“ - აცხადებს ციხელაშვილი.

მინისტრი ასევე ყურადღებას ამახვილებს საკუთრების უფლების შეზღუდვასა და მშობლიური ენზე განათლების მიღების შესაძლებლობის წართმევაზე

,,ფაქტობრივად მათ ეუბნებიან, რომ არ აქვთ ყიდვის შესაძლებლობა, მაგრამ შეუძლიათ გაყიდონ ისე, რომ მეზობელი ქართველი ამას ვერ იყიდის და თქვენ თავად ხვდებით ეს რისკენ არის მიმართული. მთელმა მსოფლიომ უნდა დაინახოს და გაიგოს, რომ ევროპის ამ ნაწილში დღეს ფაქტობრივად ადამიანები ცხოვრობენ რეზერვაციის პირობებში, მძიმე ეთნიკური დისკრიმინაციის ფონზე,“ - აცხადებს ქეთევან ციხელაშვილი.