„ნიუპოსტის“ ინფორმაციით, კვირიკაშვილმა გადაწყვეტილება ხელმოწერით უკვე დაადასტურა.

პაპუნა მარგველიძე მუშაობას ფინანსთა სამინისტროს შემოსავლების სამსახურში გააგრძელებს, ეს უკანასკნელი სამსახურის უფროსის მრჩევლის პოსტს დაიკავებს.

მარგველიძე ყოფილი პრემიერ-მინისტრის ირაკლი ღარიბასვილის კადრია, ის გუბერნატორის პოსტს 2013 წლიდან იკავებდა, ყოფილი მაღალჩინოსანი გათავისუფლების მიზეზებზე არ საუბრობს.

"ნიუპოსტის" ინფორმაციით, პაპუნა მარგველიძეს არჩილ ჯაფარიძე შეცვლის. ეს უკანასკნელი გასული არჩევნებისას "ქართული ოცნების" საარჩევნო შტაბის ხელმძღვანელი იყო.

ახალი გუბერნატორი ეყოლება გურიასაც. მოქმედი გუბერნატორი გია სალუქვაძე სამსახურში იმყოფება, თუმცა „ნიუპოსტის“ კორესპოდენტთან კომენტარის გაკეთება არ ისურვა.

ადგილზე მისულ ჟურნალისტებს კი სალუქვაძის აპატარში უთხრეს, რომ გუბერნატორმა გათავისუფლების თხოვნით მთავრობის მეთაურს პირადად მიმართა.

გია სალუქვაძე სკანდალში გუბერნატორის პოსტის დაკავებამდე გაეხვა. ის არასამთავრობო ორგანიზაცია „ყველა თაობა საქართველოსთვის“ ხელმძღვანელი იყო. სწორედ მის სახელთანაა დაკავშირებული წინა ხელისუფლების შესახებ გადაღებული დოკუმენტური ფილმი "სააკაშვილის სისხლიანი ქრონიკა", რომელიც არასამთავრობო ორგანიზაციამ სკოლის მოსწავლეებს აჩვენა. მაშინ ფაქტს ოპოზიციისა და არასამთავრობო ორგანიზაციების კრიტიკა მოჰყვა.

სალუქვაძის დანიშვნას სწორედ ამ ფილმის გადაღებას და გავრცელებას უკავშირებდნენ.

„ნიუპოსტის“ ინფორმაციით, გურიის გუბერნატორის თანამდებობაზე მერაბ ჭანუყვაძის კანდიდატურა აქტიურად განიხილება.

ჭანუყვაძე ამჟამად ოზურგეთის მუნიციპალიტეტის გამგებლის თანამდებობას იკავებს. როგორც მან „ნიუპოსტს“ განუცხადა, საკითხზე საუბარი არავისთან ჰქონია.

„ამ თემასთან დაკავშირებით საუბარი ოფიციალურად არავისთან მქონია“ - აცხადებს ჭანუყვაძე.

გურიის ჯერ კიდევ მოქმედი გუბერნატორის გარემოცვაში ამბობენ, რომ გია სალუქვაძე „სხვა სამსახურში“ გადადის, თუმცა ისინი ჯერჯერობით არ საუბრობენ სად გააგრძელებს საქმიანობას. მათი თქმით „გუბერნატორს რამდენიმე შემოთავაზება აქვს“.

აღსანიშნავია, რომ ორივე გათავისუფლებული ირაკლი ღარიბაშვილის კადრია, ამიტომ ექსპერტები არ გამორიცხავენ, რომ კვირიკაშვილმა მისი წინამორბედის კადრების წმენდა გააგრძელოს.

შეგახსენებთ, რომ რამდენიმე თვის წინ თანამდებობა ქვემო ქართლის გუბერნატორმა პაატა ხიზანიშვილმაც დატოვა. პოსტს მცხეთა-მთიანეთის სახელმწიფო რწმუნებულიც გამოემშვიდობა.