პრეზიდენტის ადმინისტრაციას ბორჯომის ტყის აღდგენისათვის მადლობის სიგელი გადაეცა

პოლიტიკა - 10:26, 09 Aug, 2017

1282

საქართველოს პრეზიდენტის ადმინისტრაციის უფროსი გიორგი აბაშიშვილი კამპანიის “აღადგინე” შემაჯამებელ ღონისძიებას დაესწრო, რომელზეც აქციის ორგანიზატორებმა ბორჯომის ტყის აღდგენის ფარგლებში ჩატარებული სამუშაოების შესახებ ანგარიში წარადგინეს.

პრეზიდენტის ადმინისტრაციასთან ერთად საღამოს იმ კომპანიის წარმომადგენლები ესწრებოდნენ, რომლებმაც წვლილი შეიტანეს ბორჯომის გადამწვარი ტყის აღდგენის პროცესში.

პრეზიდენტის ადმინისტრაციის უფროსს ტყის აღდგენისათვის სერტიფიკატები გადასცეს.

გიორგი აბაშიშვილმა დამსწრე საზოგადოებას სიტყვით მიმართა.

,,2008 წლის აგვისტოში რუსმა ოკუპანტებმა სუვერენული საქართველოს ტერიტორიების ნაწილის მიტაცებასთან ერთად გაანადგურეს ბუნებაც. ბორჯომის ტერიტორიაზე განადგურდა ტყე და მნიშვნელოვანი ზიანი მიადგა ჩვენს ეკოსისტემას. სწორედ ამიტომ განსაკუთრებით მნიშვნელოვანია ის ინიციატივა, რომელიც უზრუნველყოფს ამ ტყის აღდგენას. მასში ჩართულია უამრავი კერძო კომპანია და ფიზიკური პირი.

პრეზიდენტი სიამოვნებით შეუერთდა ამ კამპანიას და პრეზიდენტის სარეზერვო ფონდმა პრეზიდენტის ადმინისტრაციის თანამშრომლებთან ერთად მიიღო მონაწილეობა ამ ტყის აღდგენაში.

ჩვენ ვიმედოვნებთ, რომ ბორჯომის ტყის აღდგენა იქნება წინაპირობა საქართველოს ტერიტორიული მთლიანობის აღდგენის. ჩვენ ისევე წარმატებით აღვადგენთ საქართველოს ტერიტორიულ მთლიანობას, როგორც ჩვენ ყველა, საქართველოს თითოეული მოქალაქე აღვადგენთ ბორჯომის განადგურებულ ტყეს”, -აღნიშნა გიორგი აბაშიშვილმა.

კამპანიაში მონაწილეობა მიიღო 150 - მდე კომპანიამ და 5000-მდე ფიზიკურმა პირმა. ამ ეტაპზე კამპანიის ფარგლებში დაირგო 45 270 ხე, კამპანიის ორგანიზატორია “ბია” და ხორციელდება სტარტაპ “თრიფექსის” ტექნოლოგიური უზრუნველყოფით.