რუსეთის ფედერაციის პრეზიდენტი ვლადიმერ პუტინი 8 აგვისტოს ოკუპირებული აფხაზეთის ტერიტორიაზე ჩავიდა, აღნიშნულს საქართველოს პოლიტიკურ წრეებში შეფასებები მოჰყვა. მმართველ გუნდში ამ ნაბიჯს ოკუპაციის გაგრძელების დასტურად მიიჩნევენ და თვლიან, რომ მსგავს ქმედებებს საერთშორისო საზოგადოებამ მკაცრი რეაგირებით უნდა უპასუხოს:

„ყველა საერთაშორისო მექანიზმი კიდევ უფრო უნდა გაძლიერდეს ჩვენი პარტნიორების დახმარების, რომ ყველაფერს დაერქვას სახელი, როგორც ეს ხდება უკანასკნელი წლების განმავლობაში, ჩვენი წარმატებული საგარეო პოლიტიკის შედეგად და რუსეთის პრეზიდენტის ვიზიტი, ეს არის კიდევ ერთხელ დადასტურება იმის, რომ ოკუპაცია გრძელდება დღესაც და ჩვენმა საერთაშორისო პარტნიორებმა დღესაც ამას უნდა დაუპირისპირონ მკაცრი რეაგირება ყველა საერთაშორისო დონეზე,“ - განაცხადა პარლამენტის ფრაქცია ”ქართული ოცნების” თავმჯდომარემ, მამუკა მდინარაძემ.