მთელ საქართველოს გულში უნთია აგვისტოს ომის დროს დაღუპული გმირების ხსოვნის სანთელი

მთელ საქართველოს გულში უნთია აგვისტოს ომის დროს დაღუპული გმირების ხსოვნის სანთელი - პრემიერი

პოლიტიკა - 10:24, 08 Aug, 2017

1320

2008 წლის აგვისტოს რუსეთ-საქართველოს ომში დაღუპულთა ხსოვნის პატივი პრემიერმინისტრმა, გიორგი კვირიკაშვილმა მიაგო.

პრემიერი ძმათა სასაფლაოზე მთავრობის წევრებთან ერთად გამოჩნდა და გმირთა მემორიალი ყვავილებით შეამკო.

”8 აგვისტო საქართველოს უახლეს ისტორიაში უმძიმესი დღეა. მე მინდა ქედი მოვიხარო ყველა გმირის წინაშე, ვინც სიცოცხლე არ დაინანა საკუთარი სამშობლოსათვის. მთელ საქართველოს გულში უნთია მათი ხსოვნის სანთელი”, - განაცხადა კვირიკაშვილმა.

რაც შეეხება ომის შედეგებს - პრემიერის თქმით, ქვეყნის გაერთინებისთვის მუშაობენ.

"ჩვენ ვმუშაობთ, რომ მაქსიმალური ძალისხმევა დავხარჯოთ, რათა ჩვენი ქვეყანა გავაერთიანოთ, გავაძლიეროთ.

რა თქმა უნდა, მშვიდობას არ აქვს ალტერნატივა. ჩვენ ყველაფერს ვაკეთებთ პირველ რიგში იმისთვის, რომ მშვიდობა შევინარჩუნოთ. ერთიან, ძლიერ, დემოკრატიულ და ევროპულ საქართველოს ვაშენებთ, რომ ეს იყოს ერთიანი სახლი ქართველებისთვის, აფხაზებისა და ოსებისთვის. ამიტომ ჩვენ თვალებში უნდა ჩავხედოთ ერთმანეთს, ყველა სათქმელი უნდა ვუთხრათ და უნდა შევრიგდეთ. შერიგებასაც ალტერნატივა არ აქვს. ჩვენ ერთიან საქართველოში ვიცხოვრებთ და აუცილებლად გავაერთიანებთ ქართველების, აფხაზებისა და ოსების გულებს. არც ქართველებს, არც აფხაზებს და არც ოსებს დასაკარგი შვილი აღარ გვყავს",-აღნიშნა გიორგი კვირიკაშვილმა.