,,ოპოზიციური ერთობის საკითხი მხოლოდ მეორე ტურის შემთხვევაში გახდება რეალისტური“

,,ოპოზიციური ერთობის საკითხი მხოლოდ მეორე ტურის შემთხვევაში გახდება რეალისტური“ - უსუფაშვილის მოძრაობა ვაშაძეს პასუხობს

პოლიტიკა - 15:57, 07 Aug, 2017

635

გიორგი ვაშაძის შეთავაზებას, მერობის ერთიან კანდიდათან დაკავშრებით პრაიმერისის ჩატარებაზე არარეალისტურს უწოდებენ დავით უსუფაშვილის ,,შენების მოძრაობაში“. პოლიტიკურ გაერთიანებაში მიიჩნევენ, რომ ერთიანი კანდიდატის იდეა, შესაძლოა მხოლოდ მეორე ტურის დანიშვნის შემთხვევაში გახდეს ეფექტური.

„შენების მოძრაობა“ თვლის, რომ ბატონი გიორგი ვაშაძის წინადადება მერობის ერთიან ოპოზიციურ კანდიდატზე შეთანხმების თაობაზე არარეალისტური და არაეფექტიანია.

არარეალისტურია, რადგან წინასაარჩევნო პრაიმერი მიუღწეველია; არაეფექტიანია, რადგან პირველ ტურში სინერგიის ეფექტი ვერ მიიღწევა და საერთო კანდიდატის შედეგი ნაკლები იქნება, ვიდრე ყველა ოპოზიციური კანდიდატის შედეგების ჯამი.

შესაბამისად, ორტურიანი არჩევნების ლოგიკა და ძალთა არსებული ბალანსი იმაზე მიგვითითებს, რომ შესაძლო ოპოზიციური ერთობის საკითხი მხოლოდ მეორე ტურის დანიშვნის შემთხვევაში შეიძლება გახდეს რეალისტურიც და ეფექტიანიც. გარდა ამისა, ყოველი მორიგი „ქუდზე კაცი არსებული ხელისუფლების შესაცვლელად“ წარმატების შემთხვევაშიც კი შობს ისეთ ახალ ხელისუფლებას, რომელიც მალევე „ქუდზე კაცით“ ხდება შესაცვლელი.

დროა, ჩვენი მრავალჭირნახული ქვეყნის ეს მწარე გამოცდილება კარგად გავიაზროთ და ადეკვატურად ვიმოქმედოთ. თბილისს სჭირდება კარგი მერი და არა „ვინც გინდა, ოღონდ არა ოცნება“ - აცხადებენ პოლიტიკურ გაერთიანებაში.