პუტინის ვიზიტი ოკუპირებულ სოხუმში - ოპოზიცია მორიგ პროვოკაციაზე საუბრობს

პოლიტიკა - 12:24, 07 Aug, 2017

1908

რუსეთის პრეზიდენტის ვლადიმერ პუტინის სოხუმში დაგეგმილ ვიზიტს ოპოზიცია მორიგ პროვოკაციას უწოდებს.

თბილისის მეერობის კანდიდატის ზალიკო უდუმაშვილის საარჩევნო შტაბის უფროსის გრიგოლ ვაშაძის განცხადებით, ვლადიმერ პუტინის სოხუმში ვიზიტი, რუსეთის მხრიდან აშშ-ის ვიცე პრეზიდენტის მაიკ პენსის საქართველოში ვიზიტის საპასუხო ქმედებაა.

„რუსეთის ფედერაციის პრეზიდენტის ე.წ. ვიზიტი ოკუპირებულ აფხაზეთში, თავისებურ საპირწონედ აირჩიეს კრემლში, იმისთვის, რომ დაებალანსებინათ, ასე ვთქვათ, შეერთებული შტატების ვიცე პრეზიდენტის მაიკ პენსის ვიზიტი. შეერთებული შტატების ვიცე პრეზიდენტის ვიზიტის ფონზე, პუტინის ჩასვლა ოკუპირებულ აფხაზეთში, ისე სასაცილოდ, ისე გაუაზრებლად და მდაბიურად გამოიყურება, რომ კლოუნადასაც ვეღარ დაუძახებ,“ - განაცხადა გრიგოლ ვაშაძემ.

”ევროპული საქართველოს” წევრის სერგო რატიანის განცხადებით, პუტინი ამ ქმედებით, საკუთარ დამოკიდებულებას უსვამს ხაზს და ამბობს, რომ რუსეთი პოლიტიკას არ ცვლის.

„პუტინი აჩვენებს თავის დამოკიდებულებას. ის ილუზია, რომ რუსეთი შეიძლება შეიცვალოს, ილუზიადვე დარჩა, მაგრამ უნდა გააცნობიეროს ყველამ, რომ რუსეთი არ იცვლება. საქართველო აღარ არის მსოფლიო ყურადღების ცენტრში და ეს არის ერთ-ერთი სერიოზული პრობლემა და დღეს „ქართულ ოცნებას“ სურს, რომ ოკუპაციის კანონიც კი შეცვალოს და ამას დაახლოებით, ხუთი წლის განმავლობაში ვეწინააღმდეგებით,“ - განაცხადა სერგო რატიანმა.

შეგახსენებთ, საქართველოში შემოჭრის 9 წლის თავზე, 8 აგვისტოს, პუტინი ოკუპირებულ აფხაზეთში ჩადის. ინფორმაციას ამის შესახებ რუსული გამოცემა РБК ავრცელებს. გამოცემა წერს, რომ ვიზიტის ფარგლებში გაიმართება შეხვედრა რაულ ხაჯიმბასთან.

რუსეთის დუმას დსთ-ს საქმეთა კომიტეტის თავმჯდომარის მოადგილის კონსტატნტინ ზატულინის განცხადებით, პუტინის აფხაზეთში ვიზიტი უკავშირდება ,,რთულ შიდაპოლიტიკურ ვითარებას“ და საქართველოში ამერიკის ვიცე-პრეზიდენტის მაიკ პენსის ვიზიტს.

რუსულ გამოცემაში აღნიშნულია, რომ პენსმა საქართველოში სტუმრობისას ხაზი გაუსვა, რომ შეერთებული შტატები არ ცნობს აფხაზეთისა და სამხრეთ ოსეთის დამოუკიდებლობას და მხარს უჭერს საქართველოს ტერიტორიულ მთლიანობას.