გასულ კვირას თვითაღიარებული სამხრეთ ოსეთის რესპუბლიკის პრეზიდენტმა ანატოლი ბიბილოვმა ახალგორის ე.წ. ადმინისტრაციის წარმომადგენლებთან შეხვედრაზე გააკეთა განცხადება ქართული სკოლების "რესპუბლიკის" საერთო განათლების სისტემასთან შესაბამისობაში მოყვანის შესახებ, რაც სწავლების რუსულ მოდელსა და რუსულ ენაზე გადასვლას გულისხმობს.

ანატოლი ბიბილოვი ასევე უკმაყოფილოა, რომ ახალგორის სკოლებში სასწავლო პროცესი, მთლიანად ქართულად და ქართული სახელმძღვანელოებით მიმდინარეობს. მისი თქმით, სწავლება, იქაც, როგორც დანარჩენ სკოლებში, რუსულ ენაზე უნდა წარიმართოს, ქართული კი შესაძლებელია რიგით საგნად დარჩეს.

ამ საკითხზე ბრიფინგი გამართეს „ევროპულ საქართველოს“ ლიდერებმა სეგო რატიანმა და მარიამ რამინაშვილმა.

მათი თქმით ოკუპანტები აფხაზეთში განხორციელებულ სცენარს იმეორებენ - 2015 წლიდან ოკუპირებული აფხაზეთის ტერიტორიაზე გაუქმდა ქართული სკოლის სტატუსი და ქართული ენა 2-საათიან არასავალდებულო საგნად დარჩა რამდენიმე სკოლის დაწყებით საფეხურზე.

2013 წელს აფხაზეთის თვითგამოცხადებულმა რეჟიმმა ე.წ. ,,სასკოლო რეფორმა” დაიწყო, რომლის ფარგლებშიც გალის ათი სოფელი და ამ სოფლების სკოლებიც ტყვარჩელის რაიონს მიაკუთვნა, რითაც ქართველები უმცირესობაში აღმოჩნდნენ და ქართული სკოლების რაოდენობა 31- დან 11-მდე შემცირდა, მოგვიანებით, 2015 წლიდან, აფხაზეთში აღარ ფუნქციონირებს არც ერთი ქართული სკოლა.

"ევროპული საქართველოს წარმომადგენლები ხელისუფლებისგან ქმედითი ნაბიჯების გადადგმას მოითხოვენ. მათი თქმით, საქართველოს მთავრობამ რეგიონში მცხოვრები ყველა ქართველი მოსწავლე ქართული სასკოლო სახელმძღვანელოებით უნდა მოამარაგოს და დაიწყოს მუშაობა იმაზე, რომ ოკუპირებულ ტერიტორიაზე არსებულ სკოლებს ქართული სკოლის სტატუსი აღუდგეთ.

"საკითხის აქტუალობიდან გამომდინარე, ხელისუფლებამ დაუყოვნებლივ უნდა დაიწყოს საერთაშორისო ინსტიტუტებში ამ საკითხის აქტუალიზაცია, როგორც ადამიანის ფუნდამენტური ღირებულებების შელახვის ფაქტზე და განახორციელოს ქმედითი ღონისძიებები:

· უპირველეს პრობლემად განიხილოს აღნიშნული ფაქტი და დაუყოვნებლივ დაიწყოს მუშაობა ოკუპირებული ტერიტორიების იმ ნაწილში, სადაც მოსწავლეების, მასწავლებლებისა და სკოლის თანამშრომლების დიდი ნაწილი ეთნიკურად ქართველია და მათთვის მშობლიური ენა ქართულია, ამასთანავე, ყველაფერთან ერთად, ისინი ვერ ფლობენ რუსულ ენას, რომელზეც მათ უნდა მოუწიოთ სწვალების წარმართვა.

· 2017-18 სასწავლო წლისათვის ოკუპირებულ ტერიტორიებზე აღდგეს ქართული სკოლის სტატუსი.

· ასევე, რეგიონში მცხოვრები ყველა ქართველი მოსწავლისათვის, დაუყოვნებლივ იქნას მიწოდებული სასწვლო პროცესისათვის საჭირო სასკოლო სახელმძღვანელოების სრული კომპლექტი," - აცხადებენ "ევროპულ საქართველოში.

·