ავღანეთში თვითმლვლელი ტერორისტის თავდასხმის შედეგად დაღუპულ უმცროს სერჟანტ მდინარ ბებიაშვილს საქართველოში დღეს გადმოასვენებენ. გადმოსვენება ბაგრამის საავიაციო ბაზიდან, აშშ-ის საჰაერო ძალების სამხედრო თვითმფრინავის სპეციალური რეისით მოხდება.

მას აეროპორტში საპატიო ყარაული დახვდება. სამხედრო საჩვენებელი ორკესტრი კი სამგლოვიარო მარშს შეასრულებს. გარდაცვლილ მდინარ ბებიაშვილს დღესვე მშობლიურ სოფელში, მარტოთუბანში სამხედრო პატივით დაკრძალავენ.

თავდასხმის შედეგად დაშავდა კიდევ 3 ქართველი სამხედრო. მათ შორის ყველაზე მძიმე მდგომარეობა კაპიტან მიხეილ გვრიჯიშვილს აქვს.

"სტაბილურად მძიმედ რჩება კაპიტან გვრიჯიშვილის მდგომარეობა. იგი კვლავ ბაგრამის აეროპორტში იმყოფება, მას ჩაუტარდა ოპერაცია თვალზე და ფეხზე. კონტროლირებადია ვითარება. ის გონზე ჯერ არ მოუყვანიათ სპეციალურად, რათა ორგანიზმმა დაისვენოს და ოპერაცია მშვიდობიანად ჩატარდეს.

რაც შეეხება ხახუტაშვილს, ის გადაყვანილია გერმანიაში, მას ჰქონდა შედარებით მსუბუქი ჭრილობები ხელისა და ფეხის არეში, აბსოლუტურად კონტროლირებადი ვითარებაა, მსუბუქია ჭრილობები. რაც შეეხება მესამეს, ხარშილაძეს, ის ფაქტობრივად, მეორე დღესვე გამოიწერა,," - განაცხადა გენერალური შტაბის საზოგადოებრივ საქმეთა უფროსმა ოფიცერმა, ემზარ სვანიძემ.