საპატრიარქოში განმარტავენ, რომ რუსეთის სათათბიროს დეპუტატი არტიომ კავინოვი საპატრიარქოში იმყოფებოდა რუსეთის სამღვდელოებასთან ერთად და მათ არ იცოდნენ, რომ იგი რუსეთის დუმის დეპუტატი იყო.

საპატრიარქოს საგარეო საქმეთა განყოფილების უფროსის მოადგილის დეკანოზ კახაბერ გოგოტიშვილი აცხადებს, დელეგაციამ საერო პირებთან ერთად ილია მეორეს ანგელოზის დღე მიულოცა.

„არც ჩვენი მხრიდან ყოფილა მოწვევა და არც იმათი მხრიდან ყოფილა მოთხოვნა, რომ ეს პირი ჩამობრძანდეს. საზეიმო დახვედრა ამ ადამიანის კი არ იყო, საზეიმო დახვედრა იმ ადამიანების მიმართ, ვინც პატრიარქმა მიიღო და ეს იყო დაახლოებით 300 კაცი. მათ შორის იყვნენ რუსი სამღვდელოების წარმომადგენლები, რომლებსაც ახლდა ეს ადამიანი. ეს რომ ოფიციალური მიღება ყოფილიყო, მას ოფიციალური სტატუსი მიეცემოდა და საპატრიარქო თავის სიტყვას იტყოდა ან მიღების ან არ მიღებისა. საპატრიარქომ საერთოდ არ იცოდა ვინ იყო. სამღვდელოება ერისკაცებთან ერთად მოვიდა პატრიარქთან. არავითარი საუბარი არ შემდგარა, პატრიარქს ანგელოზის დღე მიულოცეს, ხელზე ემთხვივნენ და გავიდნენ"- განაცხადა დეკანოზმა.

რაც შეეხება გავრცელებულ ინფორმაციას, რომლის მიხედვითაც რუსული დელეგაციის ერთ-ერთი მასპინძელი საპატრიარქოს წარმომადგენელიც არის, კერძოდ მამა გიორგი გურჩიანი იყო, ამ საკითხზე საპტრიარქოში განმარტეს, რომ მამა გიორგი გურჩიანი სასულიერო პირია, თუმცა არ წარმოადგენს საპატრიარქოს ოფიციალურ პირს, რომ მას სტუმრების მოწვევა შეეძლოს.

რუსეთის დუმის დეპუტატმა დაბადების დღე თბილისში, ქართველ მეგობრებთან ერთად აღნიშნა.

საუბარია არტიომ კავინოვზე, რომელიც მოსკოვში „პატრიოტთა ალიანსის“ წევრებს შეხვდა, იგი ვლადიმირ პუტინის პარტიის „ედინაია რასიას“ წევრია.

ირკვევა, რომ რუსი დეპუტატი საპატრიარქოში იმყოფებოდა.