ე.წ. ციანიდის საქმე - სასამართლო პროცესზე შესვენება გამოცხადდა. როგორც დაცვის მხარე აცხადებს, აღნიშნულის მიზეზი დეკანოზის ემოციური მდგომარეობა გახდა. აღსანიშნავია, რომ უკვე ორ საათზე მეტია ბრალდებული დახურულ პროცესზე ჩვენებას აძლევს.

„დეკანოზი აძლევს დეტალურ და ამომწურავ ჩვენებას. ისაუბრა როგორ მოხდა მისი გატაცება. დეკანოზის ჩვენება ეფუძნება რეალურ არგუმენტაციას. მან აღწერა, თუ როგორ სთხოვდნენ ეღიარებინა, თითქოს ის პატრიარქს კლავდა და რომ მას ხელი უნდა დაედო სოსო ოხანაშვილისთვის.

მასზე ფიზიკური და ფსიქოლოგიური ზემოქმედება ხორციელდებოდა დაკავების მომენტიდან და დეკანოზი ამ ყველაფერზე საუბრობს, მათ შორის - როგორ მოხდა მისი ბარგის გახსნა. არ აძლევდნენ ადვოკატთან დარეკვის უფლებას. მან დაადასტურა, რომ მზად არის 5-დან ამოიცნოს ის 4 ადამიანი, რომლებმაც გაიტაცეს.

დეკანოზმა თქვა, რომ ორი გამომძიებელი, რომელიც ოქმში იყო დაფიქსირებული და რომლებმაც ჩვენება მისცეს, თითქოს დაკავებაში მონაწილეობდნენ, საერთოდ არ მონაწილეობდნენ ამ დაკავებაში. ის სხვა ადამიანებმა მოიტაცეს და ოქმში სხვა ადამიანები არიან გაფორმებული ", - განაცხადა გიორგი ფანცულაიამ.