მაიკ პენსი ოპოზიციური პარტიების ლიდერებს ხვდება

პოლიტიკა - 09:20, 01 Aug, 2017

1123

ამერიკის შეერთებული შტატების ვიცე-პრეზიდენტი მაიკ პენსი ოპოზიციური პარტიების ლიდერებს დახურულ კარს მიღმა ხვდება. შეხვედრაზე ოთხი პოლიტიკური პარტიის ლიდერები - „ევროპული საქართველოდან“ დავით ბაქრაძე, „ერთიანი ნაციონალური მოძრაობიდან“ ნიკა მელია, „შენების მოძრაობიდან“ დავით უსუფაშვილი და „თავისუფალი დემოკრატებიდან“ შალვა შავგულიძე იმყოფებიან.

”ერთიანი ნაციონალური მოძრაობის” პოლიტიკური საბჭოს თავმჯდომარე ნიკა მელია იმ თემებზე საუბრობს, რომელსაც ვიცე პრეზიდენტთან შეხვედრის დროს განიხილავს.

„ვისაუბრებ პოლიტიკურ დევნაზე. იმაზე, რომ სასამართლო სისტემა რეალურად გამოიყენება როგორც იარაღი დევნისა ოპონენტების მიმართ, მედია თავისუფლების შეზღუდვაზე,“ - განაცხადა ნიკა მელიამ.

„ევროპული საქართველოს“ ლიდერის დავით ბაქრაძის განმარტებით შეხვედრის დროს მთავარი თემა ქვეყნის უსაფრთხოება იქნება.

„ამერიკის მხარდაჭერას გადამწყვეტი მნიშვნელობა აქვს საქართველოს უსაფრთხოებისთვის. ამ თემაში შედის ერთობლივი ნაბიჯები რუსული ოკუპაციის წინააღმდეგ და ასევე, ამ თემაში მოვიაზრებთ ნატო-ში გაწევრიანებას, რაც არის მუდმივმოქმედი გარანტია ქვეყნის ტერიტორიული მთლიანობის დაცვის“, - განაცხადა დავით ბაქრაძემ.

„თავისუფალი დემოკრატების“ თავმჯდომარე შალვა შავგულიძემ კი შეხვედრაზე შესვლამდე განაცხადა, რომ ქვეყნის უსაფრთხოების საკითხთან ერთად ყურადღებას ქვეყანაში არსებულ მდგომარეობაზეც გაამახვილებს.

„ყურადღებას გავამახვილებთ ჩვენი ქვეყნის განვითარებისთვის ხელისშემშლელ ისეთ ფაქტორზე, როგორიც არის ინსტიტუციური მმართველობის მოშლა. ძალაუფლების დიდი რაოდენობით კონცენტრირება მმართველი პოლიტიკური ძალის ხელში და არაფორმალური მმართველობა“, - განაცხადა შალვა შავგულიძემ.