,,ჩვენც თქვენ გვერდით ვდგავართ, რათა მხარი დავუჭიროთ თქვენს ძალისხმევას მშვიდობიანი მსოფლიოს უზრუნველსაყოფად“

,,ჩვენც თქვენ გვერდით ვდგავართ, რათა მხარი დავუჭიროთ თქვენს ძალისხმევას მშვიდობიანი მსოფლიოს უზრუნველსაყოფად“ - კვირკაშვილი

პოლიტიკა - 23:22, 31 Jul, 2017

927

საქართველოს პრემიერ-მინისტრი გიორგი კვირიკაშვილი, მეუღლესთან ერთად, აშშ-ის ვიცე-პრეზიდენტ მაიკ პენსსა და ამერიკის დელეგაციას ოფიციალურ ვახშამზე უმსაპინძლა.

სტუმრებმა ფუნიკულიორიდან თბილისის ხედები დაათვალიერეს და ერთობლივი სამახსოვრო ფოტო გადაიღეს. მხარეებმა ასევე გაცვალეს საჩუქრები.

პრემიერ-მინისტრმა აშშ-ის ვიცე-პრეზიდენტს საქართველოს ისტორიის ამსახველი ფოტოგამოფენა დაათვალიერებინა.

გიორგი კვირიკაშვილმა და მაიკ პენსმა ცოტა ხნის წინ პირველი განცხადებები გააკეთეს. საქართველოს პრემიერმა აშშ-ის ვიცე-პრეზიდენტს ვიზიტისთვის მადლობა გადაუხადა და აშშ-საქართველოს ურთიერთობის მნიშვნელობაზე ისაუბრა.

,,ჩვენთვის დიდი პატივია საქართველოში ვუმასპინძლოთ ვიცე-პრეზიდენტ მაიკ პენსსა და ამერიკის დელეგაციას. ამერიკა საქართველოს უმთავრესი სტრატეგიული პარტნიორია, რომელთანაც საერთო ღირებულებები და გლობალური უსაფრთხოების პრიორიტეტები გვაკავშირებს.

ამერიკა ყოველთვის ჩვენს გვერდით იყო და სწორედ ამიტომ ჩვენც თქვენ გვერდით ვდგავართ, რათა მხარი დავუჭიროთ თქვენს ძალისხმევას მშვიდობიანი მსოფლიოს უზრუნველსაყოფად.

მე პირადადაც მინდა შევასრულო ჩვენს სახელმწიფოებს შორის დამაკავშირებელი ფუნქცია იმ გამოცდილებაზე დაყრდნობით, რომელიც მე, ჯერ კიდევ როგორც სტუდენტმა, ამერიკაში მაგისტრატურაში სწავლისას მივიღე.

ამ გამოცდილებამ ნამდვილად შეცვალა ჩემი ცხოვრება. ფინანსების სწავლასთან ერთად, ილინოისში გატარებულმა დრომ ამერიკისა და მისი ღირებულებების შესახებ ჩემი წარმოდგენა ჩამოაყალიბა. მახსოვს, ამერიკის ცენტრალურ ნაწილში მცხოვრები ხალხის მიერ გამოჩენილი გულუხვობა და მეგობრული განწყობა…ამერიკული ოპტიმიზმის შესანიშნავი განცდა განუწყვეტლივ მახსენებს, რომ არ არსებობს გადაულახავი წინაღობა; რომ ის, რისიც გვწამს, ძალიან მნიშვნელოვანია. ეს სულისკვეთება მახსენებს, რომ მეგობრებს უდიდესი მნიშვნელობა აქვთ, ხოლო უახლოეს მეგობრებზე მნიშვნელოვანი არაფერია. ქართველები დიდად ვუფრთხილდებით ამერიკისა და საქართველოს მეგობრობას და იმ ღირებულებებს, რომლებიც ასე მჭიდროდ გვაკავშირებს ერთმანეთთან” - განაცხადა პრემიერმა.

გიორგი კვირიკაშვილმა ხაზი გაუსვა, რომ გარდამავალ პერიოდში მნიშვნელოვანი იყო ის მხარდაჭერა, რომელიც შეერთებულმა შტატებმა საქართველოს მიმართ გამოხატა.

„საქართველო სამოქალაქო ომით დაზარალებული ქვეყნიდან გარდაიქმნა თანამედროვე, ევროპულ-დემოკრატიულ ქვეყნად. შეერთებული შტატების მეგობრობა და მხარდაჭერა სასიცოცხლოდ მნიშვნელოვანი იყო ჩვენი წარმატებისთვის. ამერიკა საქართველოს სტრატეგიული პარტნიორი იყო. ჩვენ უაღრესად ვაფასებთ ამერიკის მხარდაჭერას ამ გზაზე. არსებული გამოწვევების, სამხედრო თუ კიბერუსაფრთხოების მიუხედავად, საქართველოს მისწრაფება მშვიდობისადმი საქართველოს შიგნით და მთელ რეგიონში ურყევია. შეერთებული შტატები საქართველოს ერთგული მეგობარია, სტრატეგიული გეოპოლიტიკური პარტნიორი და სტრატეგიული პარტნიორია. პარტნიორი საერთო ღირებულებებით, რომელიც იზიარებს გლობალური უსაფრთხოების პრიორიტეტებს, ჩვენი სტრატეგიული მიზანია დავიბრუნოთ სრულფასოვანი წევრობა ევროპულ ოჯახში. ბოლო წლებში ჩვენ გადავდგით მნიშვნელოვანი ნაბიჯები ევროატლანტიკურ ინსტიტუტებთან ინტეგრაციის კუთხით, რაც მიღწეულია ასოცირებისა და ყოვლისმომცველი და ყოვლისმომცველი თავისუფალი ვაჭრობის შესახებ შეთანხმებით, ევროკავშირთან და ნატოსთან დაახლოებით,"-აცხადებს კვირიკაშვილი.