ამერიკის შეერთებული შტატების ვიცე-პრეზიდენტის მაიკლ პენსის საქართველოში ვიზიტს მმართველი გუნდის წარმომადგენლები აფასებენ. პარლამენტის თავდაცვისა და უსაფრთხოების კომიტეტის თავმჯდომარე ირაკლი სესიაშვილი აღნიშნავს, რომ პენსის ვიზიტს ხელისუფლებისთვის აქვს როგორც პოლიტიკური, ასევე პრაქტიკული დატვირთვა:

„ზოგადად მსოფლიოში არის საკმაოდ რთული გეოპოლიტიკური მოცემულობა და ამ ფონზე შეერთებული შტატების, როგორც მსოფლიოში დომინანტი, ძალიან ძლიერი დემოკრატიული სახელმწიფოს მხარდაჭერა, არის ჩვენთვის არამხოლოდ სასიცოცხლოდ მნიშვნელოვანი, არამედ ჩვენთვის ეს არის ქვეყნის პერსპექტივების გაძლიერების, განვითარების და სასურველ სივრცეში შესვლის ძალიან სწორი და კარგი საშუალება. დონალდ ტრამპის არჩევის შემდგომ მოკლე პერიოდში მოხერხდა ჩვენი პრემიერ-მინისტრის შეხვედრა მასთან, ამის შემდეგ კონგრესმა მიიღო არაერთი რეზოლუცია, განცხადება, რომელიც პირდაპირ საქართველოს მხარს უჭერდა, თავდაცვის, უსაფრთხოების სექტორში საქართველო შეერთებულ შტატებთან გამორჩეულად თანამშრომლობს, აქ აღარ არის საუბარი უბრალოდ ჩვენს პარტნიორობაზე, აქ არის საუბარი იმაზე, რომ ჩვენ ვართ მართლაც ერთი გუნდის ნაწილი.

ამ ვიზიტთან ერთად ტარდება სამხედრო წვრთნები ნატო-ს ფარგლებში - „ღირსეული პარტნიორი“, სახელწოდება თავისთავად უკვე გამოხატავს დამოკიდებულებას ჩვენს მიმართ, ეს ყველაფერი ხდება ჩვენთან და ხდება ჩვენივე უსაფრთხოების, ჩვენივე დემოკრატიის, ახალ ოჯახში, დემოკრატიულ სივრცეში შესვლისთვის, ეს არის გამორჩეული წინაპირობა. ამ ვიზიტს ჩვენთვის აქვს როგორც პოლიტიკური, ისე პრაქტიკული დატვირთვა და ველოდებით, რომ ამ შეხვედრებიდან პრაგმატულ შედეგს მივიღებთ“, - აცხადებს ირაკლი სესიაშვილი.