"გაზის ტარიფის გაზრდა კიდევ უფრო გაუსაძლისს ხდის ბევრი მოქალაქის ცხოვრებას"

"გაზის ტარიფის გაზრდა კიდევ უფრო გაუსაძლისს ხდის ბევრი მოქალაქის ცხოვრებას" - ზურაბ ჭიაბერაშვილი

პოლიტიკა - 11:22, 31 Jul, 2017

1253

“ევროპული საქართველოს” წევრმა ზურაბ ჭიაბერაშვილმა საქართველოს ქალაქებსა და რეგიონებში ბუნერივი აირის ტარიფების ზრდას აფასებს. როგორც ჭიაბერაშვილმა აღნიშნა, “ქართული ოცნების” დაპირებული კეთილდღეობის ნაცვლად სახეზეა ცხოვრების გაძვირება.

„გაზის ტარიფის გაზრდა საქართველოს ქალაქებისა და რაიონების დიდ ნაწილში კიდევ უფრო გაუძვირებს ცხოვრებას ჩვენი მოქალაქეების უმრავლესობას. მათ მეტი საფასურის გადახდა მოუწევთ არა ბუნებრივ აირში, არამედ გაძვირებულ პროდუქტშიც, რადგან გაზის ტარიფის ზრდა დამატებითი ბიძგი იქნება ინფლაციისთვის.

ფასებზე წლიურმა ზრდამ ივნისში, ვიდრე ბუნებრივი აირის საფასური გაიზრდებოდა, 7,1% შეადგინა. გაზის ტარიფის მატება იმას ნიშნავს, რომ პრაქტიკულად ყველაფერი, რასაც სასურსათო მაღაზიებში ჩვენი მოქალაქეები ყიდულობენ, კიდევ შეიძლება გაძვირდეს.

ბიძინა ივანიშვილის მმართველობის პერიოდში ჩვენი მოქალაქეების კეთილდღეობა მცირდება: ოჯახების შემოსავალი არ იმატებს, ხარჯი კი იზრდება. "საქსტატის" მონაცემებით, 2017 წლის ივნისში, წინა წლის ივნისთან შედარებით, ოთხსულიანი ოჯახის საარსებო მინიმუმი თვეში 30 ლარით გაიზარდა.

რა არის გამოსავალი?

გამოსავალია “ევროპული საქართველოს” მცირე და საშუალო ბიზნესის მხარდაჭერის პროგრამა, რომელიც გადასახადების შემცირების გზით ეკონომიკური ზრდის დაჩქარებაზე, უმუშევრობის შემცირებაზე, ფასების დასტაბილურებასა და მოქალაქეთა შემოსავლების ზრდაზეა ორიენტირებული”- განაცხადა ზურაბ ჭიაბერაშვილმა.