პენსის ისტორიული ვიზიტი მკაფიო გზავნილია, რომელიც კიდევ ერთხელ ხაზს უსვამს ჩვენი ქვეყნის რეგიონულ მნიშვნელობას

პენსის ისტორიული ვიზიტი მკაფიო გზავნილია, რომელიც კიდევ ერთხელ ხაზს უსვამს ჩვენი ქვეყნის რეგიონულ მნიშვნელობას - ქაცარავა

პოლიტიკა - 09:51, 31 Jul, 2017

1404

ამერიკის შეერთებული შტატების ვიცე-პრეზიდენტის მაიკ პენსის საქართველოში დაგეგმილ ვიზიტს პარლამენტის საგარეო ურთიერთობათა კომიტეტის თავმჯდომარე სოფიო ქაცარავა გამოეხმაურა.

მისი თქმით, პენსის ვიზიტი საქართველოში მკაფიო გზავნილია, რომელიც კიდევ ერთხელ ხაზს უსვამს ჩვენი ქვეყნის რეგიონულ მნიშვნელობას.

„აშშ-ის ვიცე-პრეზიდენტის მაიკ პენსის ისტორიული ვიზიტი საქართველოში არის მკაფიო გზავნილი, რომელიც კიდევ ერთხელ ხაზს უსვამს ჩვენი ქვეყნის რეგიონულ მნიშვნელობას და აშშ-ის ხელისუფლების მტკიცე მხარდაჭერას საქართველოს სუვერენიტეტისა და ტერიტორიული მთლიანობის მიმართ.

ვიცე-პრეზიდენტის ვიზიტი, ასევე როგორც აშშ-ის ახალ ადმინისტრაციასთან თანამშრომლობის უაღრესად პოზიტიური დინამიკა და შეერთებული შტატების ხელისუფლების მხრიდან ბოლო ერთი წლის განმავლობაში საქართველოს მიმართ მიღებული მნიშვნელოვანი გადაწყვეტილებები ადასტურებს, რომ ვაშინგტონი რჩება საქართველოს მთავარ სტრატეგიულ პარტნიორად, რომელიც მტკიცედ და ურყევად უჭერს მხარს საქართველოს დემოკრატიულ რეფორმებს, საგარეო პოლიტიკურ კურსს, ქვეყნის სწრაფ განვითარებას და სტაბილურობას.

უაღრესად მნიშვნელოვანია, რომ მაიკ პენსი დაესწრება საქართველოს ისტორიაში ყველაზე ფართომასშტაბიან სამხედრო წვრთნებს "ღირსეული პარტნიორი 2017", რაც იმის დასტურია, რომ აშშ აგრძელებს საქართველოს შეიარაღებული ძალების გაძლიერების, თავდაცვისუნარიანობის ამაღლების და ჩვენი ჩრდილო ატლანტიკური ინტეგრაციის მისწრაფებების მხარდაჭერას.

სიმბოლურია, რომ აშშ-ს ვიცე-პრეზიდენტის ვიზიტი დაემთხვა სწორედ საქართველო-აშშ-ის დიპლომატიური ურთიერთობების დამყარების 25 წლისთავს. დარწმუნებული ვარ, მისი ვიზიტი ხელს შეუწყობს ჩვენს ქვეყნებს შორის არსებული სტრატეგიული ურთიერთობების შემდგომ გაღრმავებას და მათ ახალ საფეხურზე გადაყვანას“, - განაცხადა სოფიო ქაცარავამ.