თვითმმართველობის კანონი - გაასაჩივრებენ თუ რა დეპუტატები სადაო დადგენილებას

პოლიტიკა - 10:00, 28 Jul, 2017

1033

თვითმმართველობის კანონში დაგეგმილ ცვლელებებს არასამთავრობო სექტორი აპროტესტებს. NGO- ები პოლიტიკურ პარტიებს დადგენილების საკონსტიტუციო სასამართლოში გასაჩივრებისკენ მოუწოდებენ.

სარჩელს 30 დეპუტატის ხელმოწერა სჭირდება. სამოქალაქო სექტორი საკანონმდებლო ორგანოს მიერ მიღებული დადგენილების გაბათილებას ითხოვს, რაც თვითმმართველი ერთეულების გაერთიანებას ითვალისწინებს.

"სამართლიანი არჩევნებისა და დემოკრატიის საერთაშორისო საზოგადოების" აღმასრულებელი დირექტორი მიხეილ ბენიძე აღნიშნავს, რომ საქართველოს მოქალაქეებს ადგილობრივი თვითმმართველობით სარგებლობის უფლება არ უნდა შეეზღუდოთ.

„ძალიან მნიშვნელოვანია არის, რომ ყველა სამართლებრივი გზა გამოვიყენოთ იმისთვის, რომ საქართველოს მოქალაქეებს არ შეეზღუდოთ ადგილობრივი თვითმმართველობით სარგებლობა და ამის ერთ-ერთი გზა შესაძლოა, იყოს საკონსტიტუციო სასამართლოს მეშვეობით დადგენილებაზე დავა. ბუნებრივია, აქ პარლამენტარების როლი არის მნიშვნელოვანი და პარლამენტარებმა უნდა მიმართონ საკონსტიტუციო სასამართლოს,“ - განაცხადა ბენიძემ.

თავის მხრივ, არასამთავრობო სექტორი გეგმავს გაასაჩივროს ცესკოს დაკომპლექტების ახალი წესი, რომლის მიხედვითაც ცესკოში გამარჯვებული პარტიის წარმომადგენლების რაოდენობა იზრდება.