ოლიგარქიულ-პოლიტიკურ ელიტებს შორის გარიგება - "ენმ" სააკაშვილისთვის უკრაინის მოქალაქეობის ჩამორთმევაზე

პოლიტიკა - 10:06, 28 Jul, 2017

1526

"ქართველ და უკრაინელ ოლიგარქებს შორის გარიგება" - ასე აფასებენ „ნაციონალურ მოძრაობაში“ საქართველოს მესამე პრეზიდენტისთვის მოქალაეობის ჩამორთმევას.

ენმ-ს წევრები საჭიროების შემთხვევაში, კიევში ჩასვლისა და მიხეილ სააკაშვილისთვის მოქალაქეობის ჩამორთმევის წინააღმდეგ სამართლებრივ პროცესში ჩართვისთვის მზად არიან.

„ენმ“-ში ამბობენ, რომ დღეს უკრაინის პრეზიდენტმა ისეთივე ნაბიჯი გადადგა, როგორც თავის დროზე ბიძინა ივანიშვილმა, როდესაც მიხეილ სააკაშვილის წინააღმდეგ სისხლის სამართლებრივი დევნის დაწყებით, ოპოზიციური პოლიტიკური ველი მოასუფთავა.

„მოხდა ოლიგარქიულ - პოლიტიკურ ელიტებს შორის გარიგება, მიხეილ სააკაშვილს უკანონოდ ჩამოერთვა უკრაინის მოქალაქეობა და სწორედ ისეთივე ნაბიჯი გადადგა პოროშენკომ, როგორიც ივანიშვილმა თავის დროზე, როდესაც მოისუფთავა ველი, ვინაიდან სააკაშვილს ის განიხილავდა, როგორც მთავარ კონკურენტს საქართველოში და ამ მოცემულობაში უწევს მუშაობა "ერთიან ნაციონალურ მოძრაობას“ ხუთი წლის მანძილზე. რეპრესიები, დაკითხვები, განდევნილი პოლიტიკური ლიდერები, რაც რეალურად საგანგაშო ვითარებას ქმნის ქვეყანაში,“ - განაცხადა ხატია დეკანოიძემ.

ოპოზიციური პარტია საქართველოს ხელისუფლებისგან მიხეილ სააკაშვილის დევნის შეწყვეტას ითხოვს.

„თუ ჩვენ გვთხოვენ, რომ უკრაინაში მის პარტიას დავუდგეთ გვერდში და მივაწოდოთ მასალები იმისთვის, რომ დამტკიცდეს სიცრუე იმ ბრალდებებისა, რომელსაც მას უყენებენ, ჩვენ ამას გავაკეთებთ. მაგრამ, ჩვენი მთავარი ბრძოლა ბუნებრივია, არის საქართველოში და ჩვენ მოვითხოვთ ხელისუფლებისგან, რომ დასრულდეს მის და ზოგადად ოპოზიციის წინააღმდეგ პოლიტიკური დევნა და გავაგრძელებთ ბრძოლას ბოლომდე,“ - აცხადებს ზაზა ბიბილაშვილი.