საკანონმდებლო ორგანოს პრეზიდენტის შენიშვნებს მისი საპარლამენტო მდივანი ანა დოლიძე აცნობს, თვითმმართველობის კოდექსთან დაკავშირებით პრეზიდენტის შენიშვნების წარმოდგენის დროს პარლამენტის თავმჯდომარესა და ანა დოლიძეს შორის კამათს ქონდა ადგილი. ანა დოლიძემ ირაკლი კობახიძე პრეზიდენტის ინსტიტუტზე თავდასხმაში დაადანაშაულა, ირაკლი კობახიძემ კი დოლიძეს ეთიკის ნორმების დაცვისკენ მოუწოდა.

"თავდასხმებით, შეურაცხყოფებით, დაუმსახურებელი და ღირსებას მოკლებული კრიტიკით იყო სავსე" - თქვა დოლიძემ სიტყვით გამოსვლისას, რაზეც პარლამენტის თავმჯდომარემ პრეზიდენტის საპარლამენტო მდივანს უთხრა, რომ ის "საჯარო მოსამსახურეა და შესაბამისი ეთიკის ნორმები უნდა დაიცვას".

"შეეხება შეურაცხყოფებს, მაგალითები უნდა მოიყვანოთ" - მიმართა კობახიძემ დოლიძეს. პოლემიკა ამით არ ამოწურულა ანა დოლიძემ აღნიშნა, რომ "მსგავსი ტიპის დისკურსს არ აყვება".

ამის შემდეგ, ირაკლი კობახიძემ კიდევ ერთხელ მოუწოდა საპარლამენტო მდივანს, რომ მას პოლიტიკოსებზე საუბრის უფლება არ აქვს.

"პოლიტიკურ პოლემიკაში თქვენ არ შეიძლება შემოხვიდეთ. პოლიტიკური პასუხები პრეზიდენტის პრეროგატივაა, ის არის პოლიტიკოსი თქვენგან განსხვავებით" - უთხრა ჯობახიძემ დოლიძეს.

პრეზიდენტის საპარლამენტო მდივანმა უმრავლესობას და კობახიძეს მიმართა, რომ "მათივე მიღებული კანონმდებლობით, ის პოლიტიკური თანამდებობის პირია, რომელიც ინიშნება და თავისუფლდება პრეზიდენტის მიერ".

"თქვენივე რეფორმის შედეგად, თქვენ ამოიღეთ პრეზიდენტის საპარლამენტო მდივანი საჯარო მოსამსახურეთა სიის ჩამონათვალიდან" - განაცხადა დოლიძემ, რაზეც, პარლამენტის თავმჯდომარემ თქვა, რომ დოლიძე ტყუის.

"საჯარო მოხელე რომ პოლიტიკოსთან პოლემიკაში არ უნდა შევიდეს, ეს არის პოლიტიკური თეორიის ანა-ბანა" -თქვა პარლამენტის თავმჯდომარემ.