ვენეციის კომისიის პრეზიდენტის საპასუხო წერილი მიიღო გუშინ ოპოზიციამ. 15 ოპოზიციურმა პარტიამ ვენესიის კომისიას რამდენიმე დღის წინ მიმართა. ჯანი ბუკიკიოს წერილში ხაზგასმულია, რომ ვენეციის კომისია, კვლავაც რჩება იმ პოზიციაზე, რომ საკონსტიტუციო რეფორმასთან დაკავშირებით გამოსავალი დიალოგშია, რომლის მიზანი ფართო კონსენსუსის მიღწევა უნდა იყოს და ის ვენეციის კომისიის დეპულებებს უნდა ეფუძნებოდეს.

„ნიუპოსტთან“ საუბრისას „ევროპული საქართველოს“ წევრი სერგი კაპანაძე აცხადებს, რომ აღნიშნულ წერილზე მმართველი გუნდის წარმომადგენლების მხრიდან გაკეთებული შეფასებები არის სამარცხვინო:

„ვენეციის კომისიის წერილიც ვნახეთ და ამ წერილის ყოვლად სამარცხვინო ინტერპრეტაციაც ხელისუფლების წარმომადგენლების მხრიდან, ასევე ხელისუფლებასთან ახლოს მტყოფი მედიასაშუალებების მხრიდანაც, რომლებიც ამბობენ, რომ თითქოს ჯანი ბუკიკიომ უარი უთხრა ოპოზიციის მოთხოვნას. ეს არის მარტივი წერილი, რომელშიც ბუკიკიო ეუბნება ოპოზიციურ პარტიებს, რომ ის რჩება თავის აზრზე იმასთან მიმართებით, რომ აუცილებელია კონსესუსი, შემდეგ კი ამბობს, რომ ისინი ვერ მოახვევენ თავს სხვებს საკუთარ პოზიციას, ეს არის სწორედ ჩვენი პოზიცია, რომ ასე, ერთი პარტიის მიერ, კონსესუსის გარეშე შეუძლებელია კონსტიტუციის მიღება. ამას ადასტურებს ვენეციის კომისია და არა მხოლოდ ამ ბოლო წერილით, რომ კონსტიტუციის მიღება კონსესუსის გარეშე ქვეყნისთვის ცუდი იქნება. იმედია ეს იქნება ერთგვარი ზარი ხელისუფლებისთვის, რომ გაიგონ ამ ყოველივეს მნიშვნელობა. ხელისუფლების წარმომადგენლები კი სრულიად სამარცხვინო ინტერპრეტაციას აკეთებენ“, - აცხადებს „ნიუპოსტთან“ საუბრისას სერგი კაპანაძე.