გენერალური აუდიტორი თანამშრომლებს დაემშვიდობა - როგორ აფასებს ლაშა თორდია სამსახურის მუშაობას

პოლიტიკა - 18:03, 25 Jul, 2017

1320

მთავარი აუდიტორის შეფასებით, მიუხედავად გამოწვევებისა, აუდიტის დასკვნები იყო ობიექტური, სამართლიანი და დამოუკიდებელი. მისივე განცხადებით, ბოლო 5 წლის განმავლობაში არ არსებობს პრეცედენტი, როდესაც მან რომელიმე აუდიტს გარკვეული მითითება მისცა.
ლაშა თორდია ამბობს, რომ აუდიტის სამსახურს სამუშაო პროცესში რაიმე მნიშვნელოვანი შეცდომა არ დაუშვია.
”ვფიქრობ, რომ ის პირობები, რაც განაპირობებს აუდიტის სამსახურის ეფექტურ ფუნქციონირებას, არის ყველაზე მნიშვნელოვანი. ეს არის დამოუკიდებლობა, სამართლიანობა და ობიექტურობა. ჩემი აქ ყოფნის პერიოდში, სრული პასუხისმგებლობით შემიძლია განვაცხადო, რომ არც ერთი აუდიტორისთვის არ დამივალებია რაიმეს დაწერა ან არ დაწერა. ეს იყო ის ძირითადი განმანპირობებელი, რომ აუდიტის დასკვნები იყო ობიექტური და სამართლიანი, რომელმაც შემდგომ საზოგადოებრივი ინტერესი დაიმსახურა. ერთ-ერთ ძირითად მიღწევად სწორედ დამოუკიდებლობა მიმაჩნია. შეცდომებზე მე ვერ ვიტყვი, რომ განსაკუთრებული შეცდომა დაუშვა აუდიტის სამსახურმა. შეიძლება უფრო მეტად გახსნილები ვყოფილიყავით, მეტი დებატი ყოფილიყო. შეცდომებზე ასევე შეიძლება ჩემი პირადულიც გავიხსენო. ის, რაც გამოქვეყნდა საჯაროდ და ბოდიშიც მოვიხადე, ამას ძალიან ვნანობ, თუმცა მიმაჩნია, რომ ხუთმა წელმა სამსახურის საქმიანობა უფრო მეტად წარმოაჩინა”, - განაცხადა ლაშა თორდიამ.

ლაშა თორდიას თანამდებობაზე მუშაობის ვადა დღეს ამოეწურა. ის თანამშრომლებს უკვე დაემშვიდობა. ამბობს, რომ ჯერ არ იცის, სად გააგრძელებს საქმიანობას, თუმცა აცხადებს, რომ ეს პოლიტიკა არ იქნება.
ჯერჯერობით უცნობია, ვინ შეცვლის მას. მანამდე კი გენერალური აუდიტორის მოვალეობას პირველი მოადგილე ნინო ლომჯარია შეასრულებს.