ევროსასამართლოს მოსამართლის შესარჩევად საქართველოს მთავრობა მორიგ კონკურსს აცხადებს

პოლიტიკა - 14:53, 25 Jul, 2017

1311

სტრასბურგის ადამიანის უფლებათა სასამართლოს მოსამართლეობის კანდიდატების შესარჩევად კონკურსი კიდევ ერთხელ გამოცხადდება. სამი კანდიდატიდან, რომელიც საქართველოს ევროსასამართლოს წარუდგინა შესაფერის კანდიდატურად მხოლოდ ლადო ჭანტურია იქნა მიჩნეული. სოფიო ჯაფარიძისა და შოთა გეწაძის კანდიდატურები კი სავარაუდოდ მათი ასაკის გამო ჩავარდა.

იუსტიციის მინისტრის განცხადებით კონკურსი 2 ადგილზე დღეიდან ცხადდებ ა და 25 აგვისტომდე გაგრძელდება. თეა წულუკიანმა მოწიფული ასაკის იურისტებს მოუწოდებს კონკურსში მონაწილეობა მიიღოს.

სტრასბურგის მოსამართლეობის კანდიდატების შესარჩევად საქართველოს მთავრობას უკვე მესამედ უწევს კონკურსის გამოცხადება. ევროსასამართლოს ექსპერტთა საბჭომ პირველი სამეული ნანა მჭედლიძის კანდიდატურის გამო ჩააგდო, რომელიც ევა გოცირიძემ უკონკურსოდ ჩაანაცვლა. მოგვიანებით, 2017 წლის 24 იანვარს ევროსაბჭოს საპარლამენტო ასამბლეის კომიტეტმა სამივე კანდიდატი (ალექსანდრე ბარამიძე, ევა გოცირიძე და გიორგი ბადაშვილი) ჩააგდო. 2017 წლის ივნისში საქართველოს მთავრობამ კონკურსის გზით შერჩეული კიდევ სამი ახალი კანდიდატი (ლადო ჭანტურია, სოფიო ჯაფარიძე და შოთა გეწაძე) წარადგინა. კანდიდატები იმ ხუთკაციანი სიიდან შეირჩნენ, რომელიც მთავრობას სათათბირო ორგანომ − სპეციალურად ამ მიზნისათვის შექმნილმა სამთავრობო კომისიამ, წარუდგინა.