საქართველოს საგარეო უწყება გმობს უკრაინის წინააღმდეგ რუსეთის მხრიდან განხორციელებულ აგრესიას

პოლიტიკა - 10:35, 25 Jul, 2017

1420

აღმოსავლეთ უკრაინაში ბოლო რამდენიმე დღეა სიტუაცია კვლავ დაიძაბა. რუსეთის საოკუპაციო ძალების მიერ უკრაინის სამხედრო ძალებზე თავდასხმის შედეგად 11 უკრაინელი სამხედრო დაიღუპა და 15 დაიჭრა. აღნიშნულ ფაქტს საქართველოს საგარეო საქმეთა სამინისტრო ეხმაურება. საგარეო უწყება გმობს უკრაინის სახელმწიფოს წინააღმდეგ რუსეთის ფედერაციის მხრიდან განხორციელებულ აგრესიას და მოუწოდებს საერთაშორისო თანამეგობრობას მკაცრი რეაგირებისაკენ:

„საქართველოს საგარეო საქმეთა სამინისტრო მკაცრად გმობს აგრესიულ და ძალადობრივ ქმედებებს უკრაინის აღმოსავლეთ რეგიონებში. როგორც ცნობილია 2017 წლის 18-20 ივლისის პერიოდში, უკრაინის სამხედრო ძალებზე თავდასხმის შედეგად, დაიღუპა 11, ხოლო დაიჭრა 15 ადამიანი - რაც ბოლო პერიოდში სიტუაციის განსაკუთრებულ გამწვავებას უსვამს ხაზს.

საქართველოს საგარეო საქმეთა სამინისტრო სამძიმარს უცხადებს დაღუპულთა ოჯახებს და დაჭრილებს სწრაფ გამოჯანმრთელებას უსურვებს.

საქართველოს საგარეო საქმეთა სამინისტრო კიდევ ერთხელ გმობს უკრაინის სახელმწიფოს წინააღმდეგ რუსეთის ფედერაციის მხრიდან განხორციელებულ აგრესიას და მოუწოდებს საერთაშორისო თანამეგობრობას მკაცრი რეაგირებისაკენ. ასევე მოუწოდებს მხარეებს შესრულდეს მინსკის შეთანხმებებით აღებული ვალდებულებები და შეწყდეს აგრესია უკრაინის წინააღმდეგ.“- აღნიშნულია საგარეო უწყების განცხადებაში.