"შეცდომა მომივიდა"- ოთარ კახიძე მარჯანიშვილის აქციაზე იარაღით მისვლის ფაქტს განმარტავს

პოლიტიკა - 10:12, 25 Jul, 2017

3181

ოთარ კახიძე მარჯანიშვილის აქციაზე იარაღით მისვლის ფაქტს განმარტავს. "ევროპული საქართელოს" წევრის თქმით, შეცდომა მოუვიდა, თუმცა იქვე აცხადებს, რომ მასზე თავდასხმა არ იყო გამორიცხული.
კახიძის განცხადებით, იარაღის ტარების უფლება კანონით აქვს მინიჭებული, რადგან პარლამენტის წევრია.
„იარაღს ვფლობ ლეგალურად და ტარების უფლება მაქვს, როგორც პარლამენტის წევრს. ეს არ არის უკანონო იარაღი. იარაღს ვატარებ ზოგადად, მათ შორის ამ აქციაზეც ვაპირებდი იარაღის დატოვებას, მაგრამ მოშორებით მომიწია მანქანის გაჩერება, შესაბამისად აქციაზე მისვლისას და წასვლისას საკმაოდ შორი მანძილი უნდა დამეფარა და არ იყო უსაფრთხოების ზომები შესაბამისად დაცული. თავდაცვის მიზნით ვატარებ იარაღს. უნდა დამეტოვებინა, მაგრამ ვერ მოვახერხე დატოვება იარაღის. მე ვაღიარებ, რომ შეცდომა მომივიდა, უბრალოდ იმ მიზეზით, რომ ვერ მოვახერხე მანქანის გაჩერება შეკრების ადგილას და არსებობდა გარკვეული საფრთხე, შესაბამისი მიზნით იყვნენ იქ კონტრაქციის მონაწილეები მოსული და შესაბამისად, ჩემზე თავდასხმა არ იყო გამორიცხული“, - განაცხადა ოთარ კახიძემ.
ცნობისთვის, პარლამენტის წევრი, 23 ივლისის აქციაზე იარაღით იმყოფებოდა.

ფაქტს, არასამთავრობო ორგანიზაციების კრიტიკა მოჰყვა. მესამე სექტორის განმარტებით, მართალია კახიძე პარლამენტის წევრია და იარაღის ტარების უფლება აქვს, თუმცა მარშის მიმდინარეობისას, იარაღის თან ქონის უფლება არ ჰქონდა.

შეკრებისა და მანიფესტაციის შესახებ კანონის მე-11 მუხლის მე-2 პუნქტის თანახმად, შეკრების ან მანიფესტაციის მონაწილეებს ეკრძალებათ, იქონიონ ცეცხლსასროლი იარაღი, ფეთქებადი, ადვილაალებადი, რადიოაქტიური ნივთიერება ან ცივი იარაღი.

რა რეაგირებას მოახდენს შსს ფრაქცია “ევროპული საქართველოს” თავმჯდომარის საქმეზე, ცნობილი დღეს გახდება.