"კულტურის სამინისტროს პირველად ესმის ეს თემა" - მანანა ბერიკაშვილი თეონა ცირამუას დაჯილდოებაზე

პოლიტიკა - 16:00, 24 Jul, 2017

2835

კულტურის მინისტრის მოადგილე მანანა ბერიკაშვილის მტკიცებით, მას ინფორმაცია საერთოდ არ ჰქონდა, რომ პრეზიდენტის ადმინისტრაცია "BLACK SEA ARENA"-ზე გორის ქალთა კაპელას ხელმძღვანელის, თეონა ცირამუას დაჯილდოებას აპირებდა.

აღსანიშნავია, რომ გორის ქალთა გუნდი კულტურის სამინისტროს სსიპ-ია.

კულტურის მინისტრის მოადგილე აღნიშნავს, რომ ჩატარებულ კონცერტში მათ მონაწილეობა საეროდ არ მიუღიათ.

„კულტურის სამინისტროს პირველად ესმის ეს თემა, ნამდვილად ვერაფერს გეტყვით. ჩვენი სსიპ არის გორის ქალთა გუნდი, მაგრამ პრეზიდენტის ჯილდოს თაობაზე არაფერი ვიცი, პირველად მესმის,“ - განაცხადა მანანა ბერიკაშვილმა.

შეკითხვაზე "BLACK SEA ARENA"-ზე ბიძინა ივანიშვილის მისვლა ხომ არ იყო დაკავშირებული დაჯილდოების ჩაშლასთან, მანანა ბერიკაშვილი ამბობს, რომ მსგავსი ეჭვები წარმოუდგენლად მიაჩნია.

პრეზიდენტის ადმინისტრაციას Black Sea Arena-ზე ღირსების ორდენის გადაცემის საშუალება არ მიეცა. გიორგი აბაშიშვილის განცხადებით, გორის ქალთა კაპელას ხელმძღვანელი თეონა ცირამუა გუშინ გამართული კონცერტის შემდეგ სცენაზე უნდა დაეჯილდოებინათ, თუმცა სახელმწიფო ორდენის გადაცემა პრეზიდენტის წარმომადგენელს ბათუმში მოუხდა.

"ნიუპოსტის" ინფორმაციით, კულტურის მინისტრმა ჯერ კიდევ 6 თვის წინ, მიმდინარე წლის იანვარში მიმართა პრეზიდენტის ადმინისტრაციას და თეონა ცირამუას დაჯილდოება, სწორედ "Black Sea Arena"-ზე სთხოვა.