პრეზიდენტის ვეტო - ოპოზიცია მოტივირებულ შენიშვნებს იზიარებს, ხელისუფლება მის დაძლევაზე ფიქრობს

პოლიტიკა - 10:27, 24 Jul, 2017

1090

პრეზიდენტის მოტივირებული შენიშვნები პარლამენტის ბიუროს დღეს წარედგინება, რის შემდეგაც კენჭისყრის ზუსტი თარიღი უნდა დამტკიცდეს. შეხვედრამდე პრეზიდენტის ვეტოს ირგვლივ პოლიტიკური განცხადებები გაკეთდა.

თვითმმართველობისა და საარჩევნო კოდექსებში დაგეგმილ ცვლილებებთან დაკავშირებით, პრეზიდენტის მიერ შემუშავებული შენიშვნები მიუღებელია მმართველი ძალისთვის.

ქართულ ოცნებაში ამბობებ, რომ პრეზიდენტის მოტივორებული შენიშვნები საქართველოს საკანონმდებლო სივრცესთან თავსებადი არ არის.

„მოტივირებულ შენიშვნებს უნდა გავეცნოთ, ეს არ არის მარტო ის დამოკიდებულება, რომ პრეზიდენტის ვეტო აუცილებლად უნდა დაიძლიოს. ჩვენ უნდა ვნახოთ ის შენიშვნები, რასაც პრეზიდენტი წარმოადგენს. ზოგადად, ის განცხადებები და ის შენიშვნები, რაც მან გააჟღერა, ჩვენ ვთვლით, რომ არ არის თავსებადი ჩვენი საკანონმდებლო სივრცისთვის. ამიტომ, ამაზე ვიმსჯელებთ და ამის შემდეგ მივიღებთ გადაწყვეტილებას, დავძლევთ თუ არა ვეტოს,“ - განაცხადა ირაკლი სესიაშვილმა.

პრეზიდენტის მშენიშვნებს იზიარებს საპარლამენტო ოპოზიცია. „ნაციონალური მოძრაობა“ „ქართული ოცნებას“ კანონს საკუთარ თავზე მორგებაში ადანაშაულებს. უმცირესობა ამბობს, რომ მმართველი ძალა აუარესებს დემოკრატიის ხარისხს და თვითმმართველობის პრინციპებს.

„პრეზიდენტმა სამ კანონს დაადო ვეტო, ჩვენ მხარს დავუჭერთ მის მოტივირებულ შენიშვნებს. ეს არის ხელისუფლების მიერ ყველანაირად, ნებისმიერი ხერხით მიღწევა რაღაც წარმატებისა, მომავალ არჩევნებში და უნდათ, რომ კანონებიც კი შეცვალონ ამ მიზნით. ეს არის ძალიან სერიოზული გაუარესება, როგორც საარჩევნო კანონმდებლობის, ასევე დემოკრატიისა და თვითმმართველობის პრინციპების,“ - აცხადებს "ენმ"-ის წევრი რომან გოცირიძე.

„ევროპული საქართველოს“ წევრების თქმით, „ქართული ოცნება“ თვითმმართველობის კანონს ამომრჩევლის მხარდაჭერის არარსებობის გამო ცვლის.

„ამომრჩევლის მხარდაჭერის არარსებობის პირობებში, მათ ურჩევნიათ, რაც შეიძლება ნაკლებ ოლქში ჩაატარონ პირდაპირი წესით არჩევნები. ასეთი ვიწროპარტიული, პოლიტიკური მიზნით სჯიდე მოსახლეობას და ართმევდე მათ თვითმმართველობის ეფექტურად განხორცილების შესაძლებლობას, შეუძლია მხოლოდ "ქართულ ოცნებას,“ - ამბობს ირაკლი აბესაძე.