"გვარამიას მიერ გაკეთებული შეფასება არის სრული სიცრუე -" ფინანთა სამინისტროს შემოსავლების სამსახური გვარამიას პასუხობს

პოლიტიკა - 19:42, 21 Jul, 2017

1799

საქართველოს ფინანსთა სამინისტროს შემოსავლების სამსახური ტელეკომპანია რუსთავი 2-ის გენერალური დირექტორის ნიკა გვარამიას განცხადებას ეხმაურება სადაც გვარამიამ ფინანსთა მინისტრი დიმიტრი ქუმსიშვილი კონფიდენციალური ინფორმაციის გამჟღავნებაში დაადანაშაულა. როგორც საპასუხო განცხადებაშია აღნიშნული, საგადასახადო საიდუმლოებას არ განეკუთვნება და საჯაროა გადასახადის გადამხდელის საგადასახადო დავალიანების შესახებ ინფორმაცია.

„ტელეკომპანია „რუსთავი 2“-ის გენერალური დირექტორის, ნიკა გვარამიას მიერ 21 ივლისს ბრიფინგზე გაკეთებული განცხადების საპასუხოდ, საქართველოს ფინანსთა სამინისტროს შემოსავლების სამსახური აცხადებს, რომ საქართველოს საგადასახადო კოდექსის 39-ე მუხლის 1¹ ნაწილის „კ“ ქვეპუნქტის თანახმად: საგადასახადო საიდუმლოებას არ განეკუთვნება და საჯაროა გადასახადის გადამხდელის საგადასახადო დავალიანების შესახებ ინფორმაცია.

ამდენად, საქართველოს პირველი ვიცე-პრემიერის, ფინანსთა მინისტრის მიერ გაკეთებული კომენტარი იმის შესახებ, რომ კომპანიას აქვს საგადასახადო დავალიანება, არ წარმოადგენს საგადასახადო საიდუმლოს და ამდენად, ტელეკომპანიის გენერალური დირექტორის მიერ გაკეთებული შეფასება არის სრული სიცრუე და საზოგადოების შეცდომაში შეყვანის მცდელობა”- აღნიშნულია ფინანსთა სამინიროს შემოსავლების სამსახურის განცხადებაში.