გვარამია ფინანსთა მინისტრს კონფიდენციალური ინფორმაციის გამჟღავნებაში ადანაშაულებს

პოლიტიკა - 18:16, 21 Jul, 2017

2171

რუსთავი2-ის გენერალური დირექტორის ნიკა გვარამიას თქმით, ფინანსთა მინისტრმა კანონი დაარღვია რადგან გაამხილა რუსთავი2-ის კონფიდენციალური საგადასახადო ინფორმაცია. ამის შესახებ რ2-ის დირექტორმა დღეს გამართულ საგანგებო ბრიფინგზე ისაუბრა. ნიკა გვარამიამ აღნიშნული ფაქტი კონკურენტული გარემოს დარღვევად შეაფასა:

„რაც ფინანსთა მინისტრმა ჩაიდინა არის მძიმე კანონდარღვევა, ინფორმაციის გათქმა იმ ადამიანისგან ვისაც ამის დაცვა ევალება, ეს არის საშიში სიგნალი ყველა ინვესტორისთვის. კონკურენტუნარიანობის დარღვევა არის ის რაც რ2-ის წინააღმდეგ გააკეთეს და უპირველესად ტელეკომპანია იმედის სასარგებლოდ. საქართველოს სახელმწიფოს წინაშე ტელეკომპანია რ2-ის დავალიანება გაცილებით ნაკლებია, საქართველოს სახელმწიფოს დავალიანებაზე რ2-ის მიმართ. ჩვენ ვაპირებთ მივმართოთ სასამართლოს, მათ შორის საერთაშორისო სასამართლოსაც, რომ ანაზღაურდეს ის ზიანი, რომელიც რ2-ს სახელმწიფოს ქმედებების შედეგად მიადგა. რუსთავი2-ს ერთი თეთრი არ მიუღია დამფუძნებლებისგან განსხვავებით ტელეკომპანია იმედისა , რომელიც დღეს არის ბაბილონის გოდილი და რ2-იდან წასული და გადაბირებული ადამიანებიც იმყოფებიან იქ, როგორც ჩანს გაიზარდა ხარჯები და გადაწყვიტეს რომ დაკავდნენ რ2-თან არაკოლეგიალური და არაკონკურენტული ბრძოლით. არაკონკურენტულ გარემოში სწორედ რ2 იმყოფება.“-განაცხადა ნიკა გვარმაიამ, მისი თქმით სახელმწიფო და ტელეკომპანია იმედი რუსთავი2-ის წინააღმდეგ ერთობლივად იბრძვის და "იმედმა" რ2-ის თანამშრომლები გაბერილი, არარეალური ხელფასების დაპირებით გადაიბირა.