მუხთარლის საქმე - ოპოზიცია საგამოძიებო კომისიის შექმნას ითხოვს, უმრავლესობა პოლიტიკურ შოუზე საუბრობს

პოლიტიკა - 11:15, 21 Jul, 2017

1040

აზერბაიჯანელი ჟურნალისტის აფგან მუმხთარლის საქმეზე ოპოზიცია საგამოძიებო კომისიის შექმნას ისევ ითხოვს. მათი თქმით საქმე იმდენად რეზონანსულია, რომ აუცილებელია მასზე საპარლამენტო კონტროლის განხორციელდეს.

„ერთიანი ნაციონალური მოძრაობის“ წევრის ნიკა რურუას თქმით ხელისუფლებას პროცესის გაწელვის ტაქტიკა აქვს არჩეული:

„შეიქმნას არასამთავრობოებისგან დაკომპლექტებული საგამოძიებო კომისია და განტევების ვაცის სცენარი არ გათამაშდეს. ახლა ვიღაცეებს ხსნიან იმისთვის, რომ გამოაჩინონ, რომ პრინციპულად იქცევიან, სინამდვილეში ეს ასე არ არის. გამოძიების იმედი არ მაქვს, იქნება ალბათ პროცესის გაწელვის ტაქტიკა არჩეული.“ - განაცხადა ნიკა რურუამ.

„ევროპული საქართველოს“ წევრის ზურაბ ჭიაბერაშვილის თქმით ხელილსუფლება კვალის არევას ცდილობს:

„მოთხოვნას, რომ პარლამენტის საგამოძიებო კომისია შეიქმნას და მან ჩაატაროს სრულფასოვანი გამოძიება, არაფერი არ ცვლის, იმიტომ, რომ ახლა უკვე რითიც არის დაკავებული პროკურატურა, შინაგან საქმეთა სამინისტრო და ყველა, არის წაშალონ ის კვალი, რაც ამ საქმეს ჰქონდა. ეს განცხადება, რაც გააკეთა შს მინისტრმა, უბრალოდ კიდევ ერთი კვალის ამრევი ნაბიჯია,“ - განაცხადა ზურაბ ჭიაბერაშვილმა.

ოპოზიციის მოთხოვნას არ იზიარებს საპარლამენტო უმრავლესობა, დამიანის უფლებათა დაცვის კომიტეტის თავმჯდომარის სოფო კილაძის თქმით ოპოზიციას აფგან მუხთარლის საქმის განხილვის პარლამენტში გადმოტანა შოუს მოწყობისთვის სურს:

„ოპოზიციამ შეიძლება ჩაიწეროს ამაზე პოლიტიკური ქულები, თორემ საზოგადოებისთვის მე ვფიქრობ, რომ ვერავითარი დამატებითი არგუმენტი ვერ იქნება მიწოდებული, რაც რა თქმა უნდა, ეწინააღმდეგება პარლამენტის ფუნქციონირების პრინციპებს. ამიტომ, კომიტეტის ჩატარება შოუს მოწყობისთვის მე არ მიმაჩნია მიზანშეწონილად,“ - განაცხადა სოფიო კილაძემ.