საარჩევნო კოდექსი და პრეზიდენტის ვეტო - "ქართული ოცნება" სუბიექტურ გადაწყვეტილებაზე, ოპოზიცია მოტივირებულ შენიშვნებზე საუბრობს

პოლიტიკა - 10:59, 21 Jul, 2017

1342

ქართული ოცნება პრეზიდენტის მოტივირებულ შენიშვნებს არც საარჩევნო კოდექსზე იზიარებს და მის დასაძლევად ემზადება.

მმართველ გუნდში მიაჩნიათ, რომ ახალი რეგულაციით ცესკოს დაკომპლექტება საპარლამენტო არჩევნების შედეგების მიხედვით და ხმების პროპორციულად მოხდება.

„ვეტო, ისევე როგორც სხვა შემთხვევაშიც, ახლაც არის გამოყენებული ძალიან სუბიექტური კონკრეტული პოლიტიკური დღის წესრიგის გათვალისწინებით. პარტია, რომელსაც აქვს კონკრეტული ოდენობის საზოგადოებრივი მხარდაჭერა არჩევნების შედეგად მოპოვებული ასეთივე, ამ ზომის და ამ პროპორციის ექნება წარმომადგენლობა ცესკოში,“ - განაცხადა ზაზა გაბუნიამ.

საარჩევნო კოდექსში განხორციელებულ ცვლილებებს ანტიდემოკრატიულს უწოდებს ოპოზიცია.

„ნაციონალურ მოძრაობაში“ აცხადებენ, რომ საარჩევნო კოდექსი უკან გადადგმული ნაბიჯია.

„საარჩევნო კოდექსი, რომელიც მმართველმა გუნდმა მიიღო, არის უკან გადადგმული ნაბიჯი, არის ანტიდემოკრატიული კანონი და პრეზიდენტის ვეტო არის შანსი, რომ „ქართულმა ოცნებამ“ გააცნობიეროს, რომ ამ ნაბიჯით ის ქვეყანას უკან წაიყვანს,“ - აცხადებს „ენმ“-ის წევრი ზაზა ბიბილაშვილი.

„ევროპული საქართველოს“ წევრების თქმით, კოდექსის თანახმად, ცესკოში მნიშვნელოვნად იზრდება მმართველი გუნდის წარმომადგენლობა, რაც მათი განმარტებით, საარჩევნო პროცესებს გამარჯვებული პარტიის ინტერესებს დაუქვემდებარებს.

„რეალურად, ეს ცვლილებები ემსახურება მხოლოდ და მხოლოდ საარჩევნო ადმინისტრაციებში ხელისუფლების გავლენის გაზრდას და ცესკოს დომინაციის შენარჩუნებას სხვა საარჩევნო სუბიექტებზე,“ - ამბობს „ევროპული საქართველოს“ წევრი ირაკლი კიკნაველიძე.