საკონსტიტუციო ცვლილებები - ოპოზიცია ხელისუფლებისგან რეალურ შეთავაზებას ელოდება

პოლიტიკა - 12:17, 20 Jul, 2017

1183

ოპოზიცია ხელისუფლებისგან საკონსტიტუციო ცვლილებებთან დაკავშირებით რეალურ შეთავაზებას ელოდება, თუმცა საკუთარ მოთხოვნებს აყენებს.

ოპოზიციაში აცხადებენ, რომ დიალოგის დაწყვება შესაძლებელია, თუმცა ამ პროცესში მმართველ გუნდს ულტიმატუმების ენით საუბრი არ გამოადგება.

”ერთიანი ნაციონალური მოძრაობის” პოლიტიკური საბჭოს თავმჯდომარის მოადგილე, ზაზა ბიბილაშვილი აცხადებს, რომ ამ დროისთვის, კონსულტაციებს მხოლოდ ფასადური ხასიათი ექნება.

ხელისუფლებოის მიზანი კი საკონსტიტუციო პროცესის "გაპრავებაა".

„ჯერჯერობით, როგორც ჩანს, ამ კონსულტაციებს მხოლოდ ფასადური ხასიათი ექნება და ექნება იმის მიზანი, რომ გააპრავოს საკონსტიტუციო პროცესი. ვინაიდან, კიდევ ერთხელ ვიმეორებ, ხელისფლება აცხადებს, რომ არანაირ დათმობაზე არ აპირებს წასვლას. შესაბამისად, ჩვენ არ ვაპირებთ, რომ ივანიშვილს გავუპრავოთ მისი ოჯახის კონსტიტუციის მიღების პროცესი, მაგრამ მივიღებთ მონაწილეობას ყველა იმ პროცესში ყველა იმ კონსულტაციაში, რომელსაც ექნება რეალური მიზანი, რომ ქვეყანა გამოვიყვანოთ ამ ჩიხიდან,“ - განაცხადა ზაზა ბიბილაშვილმა.

”ევროპული საქართველო" მმართველ გუნდს საკუთარი წინადადებების გახმოვანებისკენ მოუწოდებს.

ზურაბ ჭიაბერასვილის თქმით, "ქართულმა ოცნებამ“ პოზიციები გარკვეულწილად უნდა დათმოს.

„ქართულმა ოცნებამ“ მკაფიოდ უნდა თქვას, რა ცვლილებებს შეიტანს საარჩევნო სისტემის თვალსაზრისით, რომ გადავიდეთ 2020 წელს პროპორციულ სისტემაზე. ვაცხადებთ, მიმდინარე დღეების განმავლობაში ხელისუფლებამ უნდა დადოს, კონკრეტულად რას აკეთებს და მერე თითოეული ოპოზიციური პარტია და, მათ შორის, „ევროპული საქართველო“ დაინახავს რამდენად არის ეს გამოსავალი იმ ჩიხური მდგომარეობიდან, რომელშიც „ქართულმა ოცნებამ მთელი ეს პროცესი შეიყვანა,“ - განაცხადა ზურაბ ჭიაბერაშვილმა.