ალეკო ელისაშვილმა საარჩევნო შტაბის უფროსი და პრესსპიკერი წარადგინა

პოლიტიკა - 11:45, 20 Jul, 2017

2232

თბილისის მერობის დამოუკიდებელმა კანდიდატმა ალეკო ელისაშვილმა დღეს მისი საარჩევნო შტაბის ხელმძღვანელი და პრესსპიკერი წარადგინა. ელისაშვილის საარჩევნო შტაბს ორგანიზაცია „ცხენების გადარჩენის ცენტრის“ დამფუძნებელი ვანო ნორაკიძე უხელმძღვანელებს, პრესსპიკერი კი საზოგადოებრივი მაუწყებლის ყოფილი ჟურნალისტი ლაშა მესხი იქნება.

“დღეს წარმოგიდგენთ ჩემი საარჩევნო გუნდის ორ უმნიშვნელოვანეს ადამიანს და წარმომადგენელს: საარჩევნო შტაბის ხელმძღვანელს ვანო ნორაკიძესა და საზოგადოებასთან და მედიასთან ურთიერთობის მენეჯერს, მედიისთვის კარგად ცნობილ ლაშა მესხს. ხოლო ვანო ახალგაზრდა კაცი, მაგრამ იურისტების პროფესიულ წრეებში პატივსაცემი, სახელმოხვეჭილი და წესიერი ადამიანი. ჩვენ ერთად გვაქვს გავლილი სამი წლის წინ საარჩევნო პერიპეტიები; მაშინ ვანო იყო ჩემი საარჩევნო შტაბის წევრი – თავდაუზოგავი და მშრომელი. ჩვენ ერთად გვაქვს გამოცდილება, თუ როგორ უნდა გავიმარჯვოთ არჩევნებში. შესაბამისად, მე დიდი პატივით წარვადგენ მას შტაბის უფროსად და ჩემთვის დიდი პატივია, რომ სწორედ ის იქნება ამ რთულ, დაუნდობელ ბრძოლაში ჩემი შტაბის ხელმძღვანელი. რაც შეეხება ლაშას, მას კარგად იცნობთ ჟურნალისტები და საზოგადოებაც – ის არის წესიერი, კვალიფიციური, მებრძოლი, პროფესონალი და შეუპოვარი ადამიანი. მე გუდიაშვილზე გამართულ პრეზენტაციაზე დავპირდი ხალხს, რომ თანდათან წარვადგენდი ჩემს გუნდს და მხოლოდ ორი ნიშანი იქნებოდა გუნდის წევრობისთვის აუცილებელი – პროფესიონალიზმი და წესიერება. ასეთი ხალხით დავაკომპლექტებ გუნდს, ახლა ორი მათგანია წარმოდგენილი. აი ასეთ ხალხთან ერთად შევდივარ ამ ძალიან მძიმე ბრძოლაში.” – განაცხადა ალეკო ელისაშვილმა.

ალეკო ელისაშვილის თქმით არჩევნებში მისი მონაწილეობის მთავარი პრინციპი არის ის რომ ის არის დამოკიდებული მხოლოდ ხალხზე და არაა დამოკიდებული პარტიებზე და დიდ ბიზნესზე.