„ოცნების დაპირებული კეთილდღეობის ნაცვლად სახეზეა ცხოვრების გაძვირება და სიღარიბის ზრდა“- ჭიაბერაშვილი

პოლიტიკა - 11:26, 20 Jul, 2017

1218

“ევროპული საქართველოს” წევრი, ზურაბ ჭიაბერაშვილი საქსტატის მიერ გამოქვეყნებულ მაჩვენებლებთან დაკავშირებით მმართელი გუნდის დაპირების შეუსრულებლობაში ადანაშაულებს.

"საქსტატის ინფორმაციით, 2017 წლის იანვარ-ივნისის საგარეო ვაჭრობის მონაცემები ცხადყოფს, რომ ქვეყანა 2013 წლის დონეზეა.

სამაგიეროდ, ფასებზე წლიურმა ზრდამ ივნისში 7,1% შეადგინა, რაც იმას ნიშნავს, რომ პრაქტიკულად ყველაფერი, რასაც სასურსათო მაღაზიებსა თუ აფთიაქებში ჩვენი მოქალაქეები ყიდულობენ, კიდევ გაძვირდა.

სამწუხაროდ, გაზის ტარიფის გაზრდა საქართველოს ქალაქებისა და რაიონების დიდ ნაწილში კიდევ უფრო გაუძვირებს ცხოვრებას ჩვენი მოქალაქეების უმრავლესობას.

ბიძინა ივანიშვილის მმართველობის პერიოდში ჩვენი მოქალაქეების კეთილდღეობა მცირდება: ოჯახების შემოსავალი არ იმატებს, ხარჯი კი იზრდება.

"საქსტატის" მონაცემებით, 2017 წლის ივნისში, წინა წლის ივნისთან შედარებით, ოთხსულიანი ოჯახის საარსებო მინიმუმი თვეში 30 ლარით გაიზარდა.

რა არის გამოსავალი?

გამოსავალია “ევროპული საქართველოს” მცირე და საშუალო ბიზნესის მხარდაჭერის პროგრამა, რომელიც ეკონომიკური ზრდის დაჩქარებაზე, უმუშევრობის შემცირებაზე, ფასების დასტაბილურებასა და მოქალაქეთა შემოსავლების ზრდაზეა ორიენტირებული"- განაცხადა ჭიაბერაშვილმა.