"ჩემი მეუღლის ოჯახი საქართველომ ჰოლოდომორის დროს შიმშილით სიკვდილისგან იხსნა"- პოროშენკო

პოლიტიკა - 14:36, 18 Jul, 2017

7408

უკრაინის პრეზიდენტმა პეტრო პოროშენკომ გიორგი მარგველაშვილთან ერთობლივად გამართულ პრესკონფერენციაზე განაცხადა, რომ ჰოლოდომორის დროს საქართველომ მისი მეუღლის ოჯახი შიმშილით სიკვდილისგან იხსნა.

„ყველა არ იცის, რომ 1933 წელს, ჰოლოდომორის დროს, ჩემი მეუღლის დიდი ბაბუა იძულებული იყო ოჯახით თბილისში გაქცეულიყო და საქართველომ იხსნა ჩემი მეუღლის ოჯახი შიმშილით სიკვდილისგან. ჩემი მეუღლის ბებია ანა ნადეჟდინა 1943 წელს სტალინგრადში მოხვდა და ევაკუირებული იყო, სად? - თბილისში. თბილისში ცხოვრობდა. გუშინ, მარინამ თავის დედას დაურეკა და მინდა, ეს სახლი ვნახო და მადლობა გადავუხადო იმ ხალხს, ვინც ჩემი მეუღლის ოჯახს უშველა. ეს რჩება თაობებში და ეს მტკიცე საფუძველს აყალიბებს ჩვენი ნდობის და მეგობრობის.“- განაცხადა პოროშენკომ.

უკრაინის პრეზიდენტმა ყურადღება ორ ქვეყანას შორის ურთიერთობაზე გაამახვილა და განაცხადა, რომ ორივე ქვეყანას ერთი და იმავე საფრთხეები აქვთ:

„უღრმესი მადლობა მინდა გადაგიხადოთ იმ უნიკალური ატმოსფეროსთვის, რომელიც ჩვენმა დელეგაციამ პირველივე ნაბიჯებიდან იგრძნო. თქვენ მათ შორის ხართ, ვისაც უკრაინა ძალიან ენდობა. სასიამოვნოა, რომ თბილისში მაშინ ვიმყოფები, როცა ჩვენი სახელმწიფოები დიპლომატიური ურთიერთობების აღდგენის 25 წლისთავს ოთხ დღეში აღნიშნავენ" - განაცხადა პეტრო პოროშენკომ.