"ვერ დამისახელებთ ქვეყანას, რომელსაც რუსეთთან პრობლემები აქვს და მარტივად აგვარებს"- ზურაბ აბაშიძე

პოლიტიკა - 11:37, 18 Jul, 2017

2797

პრემიერის სპეციალური წარმომადგენელი რუსეთთან ურთიერთობის საკითხებში, ზურაბ აბაშიძე აცხადებს, რომ რუსეთთან პრობლემების მოგვარება ყველა ქვეყანას უჭირს. მისი თქმით საქართველოს ხელისუფლება ცდილობს ოკუპაციის გამოწვევებს ეფექტური პოლიტიკა დაუპირისპიროს:

„დღესდღეობით რუსეთთან ურთიერთობა ყველა ქვეყანას უჭირს. ვერ დამისახელებთ ქვეყანას, რომელსაც პრობლემა აქვს რუსეთთან და მარტივად აგვარებს. ამიტომ უნდა ვიყოთ ძალიან ფხიზლად და ფრთხილად, მაგრამ ამავე დროს, პრინციპულად უნდა გავატაროთ ჩვენი პოლიტიკა და დავიცვათ ჩვენი პრინციპები. ჩემი თაობის ხალხს ახსოვს „ცივი ომის" დროს რა ხდებოდა,. მაშინ ასეთი სარისკო ვითარება არ იყო მსოფლიოში, იყო რაღაც კრიტიკული მომენტები, მაგრამ რაღაც თამაშის წესები მაინც არსებობდა.

დღევანდელ მსოფლიოში საერთაშორისო სამართალი და წესრიგი თითქმის მოშლილია. ნახეთ რა ხდება ევროპაში, უკრაინაში, ახლო აღმოსავლეთში, სამხრეთ კავკასიაში. ძალიან ტურბულენტურ სამყაროში ვცხოვრობთ, ამიტომ მაქსიმალურად უნდა შევეცადოთ ყველა, შევინარჩუნოთ მშვიდობა, გავუფრთხილდეთ სტაბილურობას ქვეყანაში, რეგიონში.

ეს არის ჩვენი დიპლომატიის ერთ-ერთი მთავარი ამოცანა და რა თქმა უნდა, მოვაგვაროთ ის პრობლემები, რაც ჩვენ გვაქვს ტერიტორიული მთლიანობის კუთხით. ძალიან სახიფათო სამყაროში ვცხოვრობთ, სანამ ახალი წესრიგი ჩამოყალიბდება მსოფლიოში, ვიქნებით ამ ტურბულენტურ ვითარებაში."- განაცხადა ზურაბ აბაშიძემ.