,,საქართველოს შეუძლია იამაყოს, რომ ჰყავს მაღალპროფესიონალი და პატრიოტულად განწყობილი დიპლომატიური კორპუსი“

პოლიტიკა - 09:31, 18 Jul, 2017

3152

საგარეო საქმეთა სამინისტროს და ქართველი დიპლომატების მუშაობაზე ისაუბრა პრემიერ-მინისტრმა გიორგი კვირიკაშვილმა "ამბასადორიალი 2017"-ის გახსნაზე სიტყვით გამოსვლისას.

პრემიერის თქმით, ბოლო წლების აქტიური მუშაობის შედეგია, საქართველოს წარმატება საერთაშორისო ასპარეზზე.

„დღევანდელი ტურბულენტური და ხშირ შემთხვევაში არაპროგნოზირებადი საერთაშორისო გარემო გახლავთ უდიდესი გამოწვევებისა და რისკების წყარო, განსაკუთრებით ისეთი პატარა ქვეყნისთვის, როგორიც საქართველოა. ამგვარ გარემოში საფრთხეების თავიდან აცილება და თითოეული შესაძლებლობის გამოყენება უფრო დიდ მნიშნელობას იძენს ჩვენი ქვეყნის წარმატებული განვითარებისათვის. ნებისმიერი სახელმწიფოსთვის ის ფაქტი, რომ წარმატებით გაუმკლავდეს საერთაშორისო გამოწვევებს, რა თქმა უნდა, მნიშვნელოვანია და ამ საქმეში დიპლომატიის როლი არის განსაკუთრებული. საქართველოს შეუძლია იამაყოს, რომ ჰყავს ძალიან მაღალპროფესიონალი და პატრიოტულად განწყობილი დიპლომატიური კორპუსი“, - განაცხადა პრემიერმა.

კვირკაშვილმა გაზი გაუსვა ქვეყნის საგარეო მისწრაფებებს და აღნიშნა, რომ ურთიერთობები ევროკავშირთან ყოველწლიურად უფრო და უფრო ღრმავდება, ვითარდება და ახალ სიმაღლეებს იძენს. პრემიერმა ქვეყნის დემოკრატიული განვითარების შესახებაც ისაუბრა და განაცხადა, რომ ამის მაგალითი იყო ჩატარებული არჩევნები, რომელმაც ერთხმად დადებითი საერთაშორისო გამოხმაურება მიიღო.

პრემიერმა შეერთებული შტატებისა და ევროკავშირის ქვეყნების მხარდაჭერაზეც გაამახვილა ყურადღება. კვირიკაშვილის განცხადებით, შეერთებული შტატები მხარს უჭერს საქართველოს ტერიტორიულ მთლიანობას, რაც ქვეყნისთვის მნიშვნელოვანია.