პოროშენკოს ვიზიტი - დააყენებს თუ არა "ქართული ოცნება" სააკაშვილის ექსტრადირების საკითხს

პოლიტიკა - 10:28, 17 Jul, 2017

3110

საქართველოში დღეს უკრაინის პრეზიდენტი ჩამოდის. პეტრო პოროშენკოს მეუღლესთან და სახელმწიფო დელეგაციასთან ერთად, თბილისში დღის მეორე ნახევარში ელოდებიან. ვიზიტის კვალდაკვალ კი აქტუალური ხდება ის თუ რა საკითხზე გამართავს უმრავლესობა საუბარს უკრაინის პირველ პირთან. ოპოზიციაში არ გამორიცხავენ, რომ მმართველმა პოლიტიკურმა ძალამ პირველ პირთან შეხვედრაზე საქართველოს მესამე პრეზიდენტის, მიხეილ სააკაშვილის ექსტრადირების საკითხი წამოწიოს.

"ერთიანი ნაციონალური მოძრაობის" ლიდერი სალომე სამადაშვილი თვლის, მოთხოვნის დაყენების შემთხვევაში, სააკაშვილის დევნის პოლიტიკური საფუძველი კიდევ უფრო ნათლად გამოჩნდება.

„რაც უფრო მეტ ყურადღებას მიაპყრობს ხელისუფლება სააკაშვილის პოლიტიკურ დევნას, მით უფრო დამაზიანებელი იქნება ეს დღევანდელი ხელისუფლებისთვის. თუ ხელისუფლება შეეცდება, რომ პრობლემა გაამწვავოს, ეს იქნება მიხეილ სააკაშვილის ინტერესებში, რადგან ნათლად გამოჩნდება თუ რა მოტივაცია აქვს ამ დევნას,“ - ამბობს სალომე სამადაშვილი.

„ევროპული საქართველოს“ ლიდერებიც მიიჩნევენ, რომ მიხეილ სააკაშვილის ექსტრადირების საკითხის წამოწევა, ქვეყნისთვის სამარცხვინო იქნება.

„ქართული ოცნების“ მთავრობამ უკვე მიაყენა დიდი ზიანი საქართველო-უკრაინის ურთიერთობებს, ხელიდან გაუშვა შანსი გამოსულიყო საქართველო ერთიანი ფრონტით, რათა ჩვენი ოკუპაციის საკითხის აქტუალიზაცია მომხდარიყო საერთაშორისო ასპარეზზე. დღეს რაც არ უნდა გაზვიადებული იყოს სპეკულაციები პრეზიდენტ სააკაშვილის გადმოცემასთან დაკავშირებით, საქართველოს მთავრობის მხრიდან ამ საკითხის დაძვრა არის უბრალოდ სირცხვილი,“ - აცხადებს გიორგი კანდელაკი.

„ქართულ ოცნებაში“ კი ირწმუნწბიან, რომ მიხეილ სააკაშვილზე საუბარი დღის წესრიგში არ დგას.

“უკრაინაში, ისევე როგორც საქართველოში, ნებისმიერ შემთხვევაში არ იხილავენ საკითხს მათი მოქალაქის გადაცემისა სხვა ქვეყნისადმი, თუნდაც ბევრი შეკითხვები ჰქონდეს საგამოძიებო სტრუქტურებს და ისევე როგორც საზოგადოებას სააკაშვილისადმი. ვფიქრობ, საგანგებო თემაა ჩვენი და უკრაინის მოკავშირეობის მთელი რიგი ასპექტები, მათ შორის რუსეთთან მიმართებაში,“ - განაცხადა გია ვოლსკიმ.