აფგან მუხთარლის მეუღლე ლეილა მუსტაფაევა ძველი თბილისის მთავარ სამმართველოში იმყოფება. მისი ადვოკატის განცხადებით, საქმე ეხება მათ მიერ მოპოვებულ ახალ მტკიცებულებებს. კერძოდ, აფგან მუხთარლის პირად ფოტოალბომში აღმოჩენილია ფოტოები, რომლებზეც ის ადამიანები არიან აღბეჭდილი, რომლებიც მუხთარლის გატაცებამდე უთვალთვალებდნენ.

აფგან მუხთარლის მეუღლე აცხადებს, რომ ქართული მხარე ობიექტური გამოძიებით დაინტერესებული არ არის და შინაგან საქმეთა მინისტრს პრეტენზიებს უყენებს.

„პოლიციას მივაწოდეთ ინფორმაცია იმ სამი პირის შესახებ რომლებიც ჩვენი აზრით უთვალთვალებდა აფგან მუხთარლის გატაცებამდე. ამის შემდეგ პოლიციიდან დაგვიკავშირდნენ და გამოსაკითხად დამიბარეს. სამწუხაროდ პოლიციის საქმეს ჩვენ ვაკეთებთ, ჩვენ ვიძიებთ საქმეს ჩვენ ვაწვდით მათ მასალებს, რადგან ამბობენ, რომ შინაგან საქმეთა უწყების უსაფრთხოების კამერები არ მუშაობდა და მათ ჩანაწერები არ აქვთ. ეს ნონსენსია. აფგანი ამბობს, რომ გამტაცებლები კრიმინალური პოლიციის უნიფორმაში იყვნენ ჩაცმულები, 10 დღეში ამ სამსახურის ხელმღვანელი ამირანაშვილი მოხსნეს თანამდებობიდან და შემდეგ თქვეს რომ კამერები არ მუშაობდა. ეს სამი ფაქტი საკმარისია იმისთვის, რომ შინაგან საქმეთა მინისტრი გადააყენონ,“ - განაცხადა მუსტაფაევამ.

აფგან მუხთარლის ქართველი ადვოკატის არჩილ ჩოფიკაშვილის განცხადებით, პესიმისტური მოლოდინების მიუხედავად, გამოძიებასთან თანამშრომლობა გრძელდება.

შეგახსენებთ, რომ პარალელურად აფგან მუხთარლის ინტერესების დამცველები საქართველოსა და აზერბაიჯანის წინააღდეგ ევროპულ სასამართლოში გადასაგზავნ მიმართვას ამზადებენ.