აფხაზეთის მარიონეტული რეჟიმი საერთაშორისო საზოგადოებას ტენდენციურობაში, ხოლო ქართულ მხარეს სიცრუეში ადანაშაულებს

პოლიტიკა - 15:05, 15 Jul, 2017

3049

დე ფაქტო აფხაზეთის ე.წ. საგარეო საქმეთა სამინისტრო, გაეროში საქართველოს ელჩისა და გაეროს გენერალური მდივნის შეხვედრას ეხმიანება.

მარიონეტული რეჟიმი აცხადებს, რომ ქართული მხარე განაგრძობს საერთაშორისო ფორუმების გამოყენებას აფხაზეთში მიმდინარე მოვლენებზე "ყალბი" ინფორმაციის გასავრცელებლად, ხოლო საერთაშორისო ორგანიზაციებს მოუწოდებს, თავი შეიკავონ "ტენდენციური" განცხადებების გაკეთებისგან.

„როგორც ცნობილი გახდა 2017 წლის 12 ივლისს, გაეროში საქართველოს მუდმივმა წარმომადგენელმა შეხვედრა გამართა გაეროს გენერალურ მდივანთან ანტონიუ გუტერეშთან, რომლის დროსაც აფხაზეთსა და სამხრეთ ოსეთში უსაფრთხოების უზრუნველყოფისა და ადამიანის უფლებების კონტროლის მიზნით საერთაშორისო მექანიზმების შექმნის მნიშვნელობას გაუსვა ხაზი.

სამწუხაროდ, ქართული მხარე განაგრძობს სხვადასხვა საერთაშორისო ფორუმის გამოყენებას აფხაზეთში მიმდინარე მოვლენებზე ცალმხრივი და ყალბი ინფორმაციის გასავრცელებლად.

დასავლელი პარტიონების პროტექციით, საქართველო ბლოკავს აფხაზეთის წარმომადგენლების მონაწილეობას ნებისმიერი საერთაშორისო ინსტიტუტის მუშაობაში. ამდენად, ჩამოყალიბდა პრაქტიკა, როდესაც საერთაშორისო თანამეგობრობა საქართველოს პროპაგანდის მიერ გავრცელებულ არაობიექტურ ინფორმაციას ეყრდნობა, რომლის მიზანიც აფხაზეთისთვის არახელსაყრელი იმიჯის შექმნაა.

აფხაზეთის საგარეო საქმეთა სამინისტრო აუცილებლად მიიჩნევს გავიხსენოთ, რომ ქართულ-აფხაზური კონფლიქტის მოსაგვარებლად, ერთადერთ საერთაშორისო მექანიზმად რჩება ჟენევის საერთაშორისო დისკუსიები და ასევე ინციდენტების პრევენციისა და მათზე რეაგირების მექანიზმი.

ამ ფონზე, ქართული მხარის რეგულალური მოწოდებები , რაიმე დამატებითი საერთაშორისო მექანიზმების შექმნის შესახებ, უბრალოდ აბსურდულად გამოიყურება.

გარდა ამისა, როგორც პრაქტიკა გვიჩვენებს, ქართული მხარე აბსოლუტურად არ არის მზად, მოძებნოს რეალური გადაწყვეტა არსებული პრობლემებისა, რომელიც მიზნად ისახავს ქართულ-აფხაზური კონფლიქტის მოგვარებასა და რეგიონში უსაფრთხოების პირობების გაუმჯობესებას.

ამის დამადასტურებელი, ქართული მხარის დესტრუქციული ქმედება ჟენევის მოლაპარაკებების 40-ე რაუნდზე, რომლის დროსაც , მოლაპარაკებებში მონაწილეებმა ქართული მხარის მიერ შეთავაზებულ წინადადებაზე - ძალის არგამოყენების შესახებ, სიტყვიერად შეთანხმდნენ. ერთადერთი მონაწილე, რომელმაც დოკუმენტის მიღებაზე უარი განაცხდა, ქართული მხარე იყო.

ეს აშკარა ფაქტი არის პირდაპირი და ცალსახა მტკიცებულება იმისა, რომ ქართულ მხარეს უსაფრთხოების საკითხების გადაწყვეტა არ სურს.

რაც შეეხება, ქართველი პოლიტიკოსების ბრალდებებს იმის თაობაზე, რომ აფხაზეთში ადგილი აქვს ადამიანის უფლებების სერიოზულ დარღვევებს, პოლიტიზირებული და პოპულისტური ხასიათი აქვს.

აფხაზეთის საგარეო საქმეთა სამინისტრო კიდევ ერთხელ ამახვილებს ყურადღებას, რომ ქართულ-აფხაზური კონფლიქტის შესახებ, საერთაშიროსო ორგანიზაციებმა უნდა მიიღონ სანდო ინფორმაცია ყველა მხარისგან და მოუწოდებს, თავი შეიკავონ ტენდენციური განცხადებების გაკეთებისა და დოკუმენტების მიღებისგან, რაც ამ საერთაშორისო ორგანიზაციების ავტორიტეტს ჩრდილს აყენებს" - ნათქვამია ე.წ. სამინისტროს განცხადებაში.