დაპირისპირება აბასთუმნის სკოლაში - “ევროპული საქართველო“ ჯეჯელავასგან რეაგირებას მოითხოვს

პოლიტიკა - 12:47, 15 Jul, 2017

1749

“ევროპული საქართველოს“ წევრები განათლების მინისტრისგან აბასთუმნის საჯარო სკოლაში მიმდინარე პროცესებით დაინტერესებას და მასზე სწრაფ რეაგირებას მოითხოვენ. სერგო რატიანი განცხადებით, დირექტორს სკოლის დახურვა აქვს გადაწყვეტილი და მასწავლებლებს სამსახურიდან მიზეზის გარეშე ათავისუფლებს, მაგალითად, არასასწავლო პერიოდში საღეჭი რეზინის ან მობილური ტელეფონის მოხმარების გამო. აღნიშნულთან დაკავშირებით „ევროპული საქართველო“ განცხადებას ავრცელებს:

„აუცილებელია გამოვეხმაუროთ ადიგენის რაიონის სოფელ აბასთუმნის საჯარო სკოლაში მიმდინარე საგანგაშო სიტუაციას, რომელიც რამდენიმე თვეა მიმდინარეობს, ამ მომენტისთვის კი უკიდურესად დაძაბული სიტუაცია, მიუხედავად ამისა, განათლებისა და მეცნიერების სამინისტროს პოზიცია ამ წუთამდე არ დაუფიქსირებია, რაც საკმაო საფუძველია, დავასკვნათ, რომ სისტემა ვერ ფუნქციონირებს და მიშვებული პროცესები აზარალებს როგორც ადგილობრივ პედაგოგებს, ასევე, მთლიანად აისახება ქვეყნის მასშტაბით განათლების სფეროში მიმდინარე პროცესებზე.

აღნიშნული სკოლის შენობა უკვე წლებია სადაოდაა გამხდარი. თვითმარქვია მეპატრონემ სკოლის შენობის მესაკუთრედ გამოაცხადა თავი და, 2014 წლიდან დაიწყო სკოლის ადმინისტრაციის დაშანტაჟება, რომელიც მიმდინარე სასწავლო წლის განმავლობაში ძალიან გამწვავდა, კერძოდ, თვითმარქვია მეპატრონე ღიად ითხოვს რამდენიმე პედაგოგის გათავისუფლებას იმ მოტივით, რომ მათ თვლის მისთვის არასასურველ პირებად და თუ დირექტორი არ მიიღებს გადაწყვეტილებას მათი გათავისუფლების შესახებ, სკოლას დაატოვებინებს ფართს და განათლების სამინისტროსთან არ გააფორმებს იჯარის ხელშეკრულებას.

ამ მომენტისთვის სკოლის დირექტორმა მითითებული პედაგოგებიდან ერთი, კანონმდებლობის სრული გვერდის ავლით, გაათავისუფლა და, დაიწყო დანარჩენ პედაგოგებთან ხელშეკრულების შეწყვეტისათვის საჭირო დოკუმენტების შეგროვება, კერძოდ, ასეთი ქმედების კანონიერი საფუძვლის მინიჭებისთვის საჭირო დისციპლინური სახდელების შეგროვება.

მოვითხოვთ განათლების მინისტრისაგან, სასწრაფოდ დაინტერესდეს აღნიშნული ფაქტით და უზრუნველყოს დასაქმებული პედაგოგების უსაფრთხო სამუშაო გარემო და აღნიშნული სკოლის მოსწავლეებისათვის განათლების მისაღებად საჭირო საგანმანათლებლო სივრცე. გარდა ამისა, განმარტოს, წლების განმავლობაში, თუ აღნიშნული ფართი არ წარმოადგენდა სახელმწიფოს კუთვნილებას, რატომ არ მოხდა საჯარო სკოლისთვის შესაბამისი ფართის მოძიება და ამასთანავე, რატომ იხარჯებოდა მნიშვნელოვანი თანხა სახელმწიფოს ბიუჯეტიდან აღნიშნული ფართის რეაბილიტაციისათვის.“- აღნიშნულია განცხადებაში.