სახელმწიფო უწყებები მთლიანად უნდა გაიწმინდოს გიულენის ორგანიზაციის წევრებისგან- თურქეთის ელჩი

პოლიტიკა - 18:38, 14 Jul, 2017

1042

თურქეთის ელჩმა ზექი ლევენთ გუმრუქჩუმ დღეს სპეციალური პრესკონფერენცია გამართა და თურქეთ- საქართველოს ურთიერთობის მნიშვნელოვან საკითხებზე ისაუბრა. ელჩი ერთი წლის წინ თურქეთში მომხდარ მოვლენებსაც გამოეხმაურა და განაცხადა რომ თურქეთში შეიარაღებული დაჯგუფებების მიზანი რომ განხორციელებულიყო და სახელმწიფო გადატრიალება წარმატებით დასრულებულიყო, დღეს ათათურქის მიერ დაარსებული რესპუბლიკა აღარ იარსებებდა. გუმრუქჩუს შეფასებით, ეს იყო ყველაზე საშინელი ღალატის ფაქტი თურქეთის ისტორიაში, რომლის დროსაც 250 ადამიანი დაიღუპა, 2500-ზე მეტი კი დაშავდა. ელჩის თქმით ამ ყველაფრის უკან ფეთჰულან გიულენი იდგა, გუმრუქჩუს განცხადებით, უნდა მოხდეს გადატრიალების მცელობის უკან მდგომი ორგანიზაციის მთლიანად გამოაშკარავება და სახელმწიფო უწყებები მთლიანად უნდა გაიწმინდოს მისი წევრებისგან. ეს შეიძლება იყოს რთული პროცესი, მაგრამ ძალიან საჭირო და მნიშვნელოვანი თურქეთისთვის:

„თურქეთის ისტორიაში ეს იყო პირველი შემთხვევა, როდესაც დაჯგუფებებმა იარაღი საკუთარი ხალხისა და სახელმწიფო უწყებების წინააღმდეგ გამოიყენეს. თურქეთის რესპუბლიკისთვის ეს იყო ერთგვარი სამოქალაქო ომი, რა დროსაც თურქი ხალხი გმირობის ფასად შეიარაღებულ დაჯგუფებებს დაუპირისპირდა. ჩვენი ხალხი თავდადებული გმირობის ფასად დაუპირისპირდა შეიარაღებულ დაჯგუფებას და მათ მიერ ქუჩაში გამოყვანილ ტანკებს. მათ მნიშვნელოვანი ისტორიული ფურცელი გადაშალეს ჩვენი ქვეყნის ისტორიაში“- განაცხადა გუმრუქჩუმ.

ელჩის თქმით თურქული საზოგადოება ერთსულოვანია იმ საკითხში, რომ გადატრიალებაში მოქმედი პირები უნდა გასამართლდნენ:

„ამ საკითხთან დაკავშირებით ჩვენს საზოგადოებაში არ არსებობს არავითარი განსხვავებული მოსაზრება. ჩვენი საზოგადოება სრულად თანხმდება, რომ ეს სამართლებრივი პროცესი უნდა იყოს ბოლომდე მიყვანილი.“ - განაცხადა ელჩმა.