ბათუმში მიმდინარე კონფერენციაზე გვიანობამდე მსჯელობდნენ არსებულ პრობლემებზე, მათ შორის რუსეთიდან მომდინარე საფრთხეებზე, მცოცავ ოკუპაციასა და ანექსირებულ ტერიტორიებზე. საქართველოს თავდაცვის მინისტრის ლევან იზორიას განცხადებით, დისკუსიის მონაწილეებმა მსოფლიო უსაფრთხოებაში საქართველოს წვლილზე და მისი უსაფრთხოებისთვის ევროპისა და მსოფლიოს მნიშვნელობაზე ისაუბრეს.

„ევროპის უსაფრთხოების არქიტექტურის ქვაკუთხედი რჩება ნატო აშშ-ის ლიდერი პოზიციით. ამიტომ, ჩვენს უსაფრთხოებას ვხედავთ მხოლოდ ჩრდილოატლანტიკურ ალიანსში გაწევრიანებაში,“ - განაცხადა ლევან იზორიამ.

ქვეყნის უსაფრთხოებაში ჩრდილოატლანტიკური ალიანსის როლზე საუბრობენ „ნაციონალურ მოძრაობაშიც”:

„ძალიან მნიშვნელოვანია, რომ ჩვენმა პარტნიორებმა იცოდნენ რეალური ვითარება ჩვენს ქვეყანაში, მაგრამ კიდევ უფრო მნიშვნელოვანია, რომ საქართველოს მთავრობას, რომელსაც ყველაზე მეტი ბერკეტი აქვს ქვეყანაში საქმეების საკეთებლად, ირეაგიროს ადეკვატურად და ხშირად განცხადებები, რომელიც კეთდება, არ განსხვავდებოდეს ქმედებებისგან,“ - აცხადებს გია ბარამიძე.