ქობულეთის და კინტრიშის დაცულ ტერიტორიებს ადმინისტრაციის და ვიზიტორთა ცენტრის შენობა გაიხსნა

პოლიტიკა - 10:44, 14 Jul, 2017

1084

გარემოსა და ბუნებრივი რესურსების დაცვის მინისტრის მოადგილემ ეკატერინე გრიგალავამ ქობულეთის და კინტრიშის დაცული ტერიტორიების ახალი ადმინისტრაციის და ვიზიტორთა ცენტრის შენობა აჭარის მთავრობის თავმჯდომარესთან, ზურაბ პატარაძესთან ერთად გახსნა.

შენობა კოლხეთის დაცული ტერიტორიების განვითარების ფონდის და გერმანიის რეკონსტრუქციისა და განვითარების ბანკის ფინანსური მხარდაჭერით აშენდა და ადმინისტრაციას, ვიზიტორთა ცენტრს, საგამოფენო სივრცეს, სასტუმროს 4 ნომერს და კაფეს აერთიანებს.

ქობულეთის დაცული ტერიტორიები 1998 წელს შეიქმნა. ის უნიკალური სფაგნუმიანი ჭაობებით განთქმულ ქობულეთის ნაკრძალსა და აღკვეთილს აერთიანებს.

ქობულეთის დაცული ტერიტორიები მოიცავს ისპანი 1-ისა და ისპანი 2-ის სფაგნუმიან ტორფნარებს, რომლებზეც მოწყობილია ბილიკები და ვიზიტორებს საშუალება აქვთ განახორციელონ საგანმანათლებლო-სამეცნიერო ტურები. ჭარბტენიან ტერიტორიებზე ტურისტებს ჭაობის თხილამურებით სარგებლობის საშუალება აქვთ.

კინტრიშის დაცული ლანდშაფტი აჭარის ავტონომიურ რესპუბლიკაში, ქობულეთის რაიონში მდებარეობს და მისი საერთო ფართობი 13.893 ჰა-ს შეადგენს. იგი მოქცეულია მდინარე კინტრიშის თვალწარმტაც ხეობაში, სოფ. ცხემვანსა და ხინოს მთებს შორის, ზღ. დ.-დან 300-2500 მ-ის სიმაღლეზე. კინტრიშის დაცული ტერიტორიები ორ სხვადასხვა კატეგორიის დაცულ ტერიტორიას - სახელმწიფო ნაკრძალსა და დაცულ ლანდშაფტს მოიცავს.

რელიქტური ტყეებითა და მცენარეთა ენდემური სახეობებით გამორჩეული ტერიტორია ვიზიტორებს ორ სხვადასხვა სირთულის მარკირებულ და კეთილმოწყობილ მარშუტს სთავაზობს.

აჭარის რეგიონში 4 დაცული ტერიტორია ფუნქციონირებს, მტირალას ეროვნული პარკი, მაჭახელას ეროვნული პარკი, ქობულეთის დაცული ტერიტორიები და კინტრიშის დაცული ლანდშაფტი.

ვიზიტორთა ცენტრის გახსნის ცერემონიას საქართველოს მთავრობის, დონორი ორგანიზაციების, ადგილობრივი მუნიციპალიტეტების წარმომადგენლები, პარლამენტის და აჭარის მთავრობის წევრები და სხვა მოწვეული სტუმრები ესწრებოდნენ.