მცოცავი ოკუპაცია და რუსეთის მიერ საქართველოს ანექსია - სოფელ ბერშუეთთან დღეს საპროტესტო აქცია გაიმართება ლოზუნგით „არა ოკუპაციას!“. აქციაში მონაწილეობას მედიის წარმომადგენლები იღებენ, ასევე ცნობილი გახდა, რომ აქციას ოპოზიციაც შეუერთდება.

“თითოეულ ადამიანს აქვს დიდი მნიშვნელობა, რომ ჩვენი ქვეყნის თავისუფალი, ევროპული, ტრანსატლანტიკური მომავალი რუსეთმა ვერ წაგვართვას. არადა ბრძოლა არის ამაზე, ცდილობენ საქართველოს ჩამოცილებას, ერთი ერთზე დატოვებას რუსეთთან და ჩამოცილებას ევროატლანტიკური ინტეგრაციის გზიდან,“ - განაცხადა "ერთიანი ნაციონალური მოძრაობის" პოლიტიკური საბჭოს წევრმა, ნიკა რურუამ.

„ევროპული საქართველოს“ წარმომადგენლების განცხადებით, დაგეგმილი აქცია მიმართული იქნება როგორც ოკუპაციის, ასევე საქართველოს ხელისუფლების უმოქმედობის წინააღმდეგ:

„ოკუპაციის გაპროტესტება უკვე ღირსების საქმეა საქართველოს ყველა მოქალაქისთვის, რადგან ჩვენ ვხედავთ ყოველდღიურად როგორი საფრთხე ექმნებათ ოკუპირებულ ტერიტორიებთან მცხოვრებ ჩვენს მოქალაქეებს. ჩვენი ხელისუფლების ვალია, რომ დაიცვას ამ ადამიანების თავისუფლება და სიცოცხლე, რასაც სამწუხაროდ, დღეს ჩვენ ვერ ვხედავთ,“ - აცხადებს ირაკლი კიკნაველიძე.