ავარიული შენობების დაზღვევა სავალდებულო ხდება

პოლიტიკა - 16:31, 13 Jul, 2017

1846

ეკონომიკის სამინისტრო მშენებლობის დაზღვევის შემოღებაზე მუშაობს. საკითხზე დეველოპერებთანდა სადაზღვევო კომპანიებთან რამდენიმე შეხვედრა უკვე გაიმართა. როგორც ჟურნალისტებს ეკონომიკის მინისტრის მოადგილემ განუცხადა, როცა შენობა ექსპლუატაციაში შევა, ის დაზღვეული კონსტრუქციული ხარვეზებისგან უნდა იყოს.

„დაზღვევა სავალდებულო იქნება. პირველი რიგში, ეს მრავალბინიან სახლებს შეეხება. კერძო სახლებს შეეხება თუ არა, ეს დამატებითი მსჯელობის საგანი იქნება. საჭიროა დამატებითი კონსულტაციები შესაბამის პირებთან, თუმცა მრავალბინიან სახლებზე აუცილებლად გავრცელდება. იმ შემთხვევაში, თუ შენობაში კონსტრუქციული ხარვეზი აღმოჩნდება ან უფრო დიდი პრობლემა, რამაც შენობა საცხოვრებლად უვარგისი გახადა, დაზღვევის შედეგად, ნაკლის გამოსწორება უნდა მოხდეს, თუ ეს ნაკლი გამოსწორებას ექვემდებარება იმისათვის, რომ ხალხის ინტერესები არ შეილახოს. თუ გამოვლინდა, რომ შენობას ტექნიკური ხარვეზი გააჩნია, ასეთ შემთხვევაში, ამ ხარვეზის გამოსწორება მოხდება. საუბარია, ფარულ ხარვეზზე, რომელიც შენობის ექსპლუატაციაში მიღების დროს არ ჩანს, მაგრამ ერთი წლის შემდეგ გამოჩნდება, რომ ხარვეზი არსებობს“, - განაცხადა ქავთარაძემ.

რაც შეეხება „სივრცითი მოწყობისა და მშენებლობის კოდექსს“ რომელიც პარლამენტში მთავრობის მიერ არის ინიცირებული, მინისტრის მოადგილე აცხადებს, რომ K2 კოეფიციენტის გაყიდვა აღარ მოხდება.

"იმისათვის, რომ ხისტი მიდგომა არ იყოს, შესაძლებელია შესაბამისი ღონისძიებების გატარება, რომელიც იმას დააკომპენსირებს, თუ შესაბამისმა ქალაქგეგმარების დოკუმენტებმა ამის საჭიროება მოითხოვა. ამის თაობაზე საკომიტეტო განხილვები გვექნება და ისეთი გადაწყვეტილებები იქნება მიღებული, რომელიც ქალაქს, იერსახის შენარჩუნებას და იმას წაადგება, რომ ქალაქში მცხოვრებ თითოეულ ადამიანს ნორმალური საცხოვრისი და გარემო ჰქონდეს იმისათვის, რომ ბავშვები გაზარდონ“, - აღნიშნა ქავთარაძემ.

მინისტრის მოადგილის ცნობით, ცვლილებები შეეხება მშენებლობასაც და პროექტით, ინსპექტირების ორგანოები შემოდის, რომლებიც მშენებლობის ყველა ეტაპს დააკვირდებიან და ბოლოს, მათ დასკვნა უნდა გასცენ იმის თაობაზე, რომ მშენებლობა ყველა შესაბამისი ნორმის მიხედვით ჩატარდა.