სომხეთი იმედოვნებს, რომ აფხაზეთის და ცხინვალის გავლით სავაჭრო დერეფნები მალე გაიხსნება

პოლიტიკა - 16:41, 13 Jul, 2017

5796

სომხეთი იმედოვნებს, რომ რუსეთსა და საქართველოს შორის სავაჭრო დერეფნები აფხაზეთისა და სამხრეთ ოსეთის გავლით ახლო მომავალში ამოქმედდება.
სომხური მედიის ცნობით ამის შესახებ განცხადება სომხეთის ტრანსპორტის, კომუნიკაციისა და საინფორმაციო ტექნოლოგიების მინისტრმა ვაან მარტიროსიანმა გააკეთა. ის ამ განცხადებით საქართველოსა და რუსეთს შორის 2011 წელს ხელმოწერილი შეთანხმების რეალიზების შესაძლო დაწყებას გამოეხმაურა:

„მსგავსი განცხადებები დიდი ხანია კეთდება. პროცესი დამოკიდებულია პირველ რიგში, რუსულ-ქართული ურთიერთობების განვითარებაზე. კონკრეტული შედეგი კი იქნება მხოლოდ მაშინ, როდესაც სავაჭრო დერეფნები ნამდვილად გაიხსნება. მე ვიმედოვნებ, რომ ეს ახლო მომავალში მოხდება. ამჟამად მუშაობა მიდის, საქართველოს, რუსეთის და შვეიცარიული კომპანია SGS-ის მხრიდან. ჩვენ ამ სიტუაციაში გარე დამკვირვებელი ვართ, მაგრამ ვხედავთ დაინტერესებას, როგორც ქართული ასევე რუსული მხრიდანაც. თუმცა ბევრი დეტალი არსებობს, რომელზეც მოლაპარაკება უნდა მოხდეს, რასაც დრო სჭირდება. ამას გაგებით უნდა მოვეკიდოთ, თუმცა შედეგი აუცილებლად იქნება

მინისტრის თქმით, აფხაზეთის გავლით სატრანსპორტო დერეფანი სომხეთს „ზემო ლარსის“ ალტერნატივას გაუჩენს, რაც შეამსუბუქებს ჩრდილოეთის მიმართულებით არსებულ გადაზიდვებს და აამოქმედებს კონკურენციას, რაც დადებითად იმოქმედებს ფასებზეც.

სავაჭრო დერეფნების შესაძლო გახსნას გამოეხმაურა სომხეთის ლოგისტიკური კომპანიის „Trans Logistic Caucasus“-ის ხელმძღვანელი ეგიშე ოვანისიანი, მისი თქმით აფხაზეთის გზის შესახებ საუბარი სიახლე არაა, თუმცა ეს ლაპარაკი, ყოველთვის მხოლოდ ლაპარაკად რჩება.
„ამ მარშრუტების ამოქმედება შეუთავსებელია საქართველოს არაერთგზის გაჟღერებულ მოთხოვნასთან, იმასთან დაკავშირებით, რომ საკონტროლო გამშვებ პუნქტებზე ფსოუზე და როკის გვირაბთან მათი მებაჟეები იდგნენ. თუ ეს მოთხოვნა ისევ ძალაშია, წმინდა ტექნიკური თვალსაზრისით მაშინ მე ამ მხრივ გამოსავალს ვერ ვხედავ. ბევრი კითხვა არსებობს, მათ შორის მთავარია ის თუ ამ ორიდან რომელი ქვეყანაა ნამდვილად დაინტერესებული ამით. ნამდვილად დაინტერესებულები ვართ ჩვენ , საქართველო და რუსეთი- გაუგებარია“- განაცხადა ოვანნისიანმა.