"ევროპარლამენტარებთან შეხვედრაზე ოკუპაციის თემაზე არ ყოფილა საუბარი"- თამარ ხულორდავა

პოლიტიკა - 15:57, 13 Jul, 2017

1440

საქართველოს პარლამენტის თავმჯდომარისა და ევროპასთან ინტეგრაციის კომიტეტის თავმჯდომარის ევროპარლამენტარებთან შეხვედრის დროს განხილვის მთავარი საკითხი საკონსტიტუციო რეფორმა იყო და მათ საქართველოს ტერიტორიების ოკუპაციისა და საოკუპაციო ხაზის გადმოწევის საკითხზე არ უსაუბრიათ. ამასთან დაკავშირებით კომენტარი ევროპასთან ინტეგრაციის კომიტეტის თავმჯდომარემ თამარ ხულორდავამ გააკეთა:

„ძირითადი საკითხი, რომელზეც ვისაუბრეთ კიდევ და კიდევ, იყო საკონსტიტუციო რეფორმა, იმიტომ რომ პარლამენტის სპიკერთან შეხვედრაზე ევროპარლამენტარები პირველ რიგში ამ საკითხს აყენებენ. ასევე ვისაუბრეთ ევროპარლამენტსა და საქართველოს პარლამენტს შორის თანამშრომლობის სხვადასხვა ფორმატებზე. ამ კონკრეტულ შემთხვევაში ოკუპაციის თემაზე არ ყოფილა საუბარი. ჩვენ ერთი კვირის წინ ვიყავით სტრასბურგში, სადაც გვქონდა შეხვედრები ევროპარლამენტარებთან მათ შორის, ამ შეხვედრებზე ერთ-ერთი საკითხი, რომელიც ისმებოდა , იყო ოკუპაციის საკითხი. გარდა ამისა, ჩვენ ვმონაწილეობთ სხვადასხვა საერთაშორისო ფორმატებში და ყველა პლატფორმაზე ძალიან აქტიურად დგას ეს საკითხი ჩვენი ძალისხმევის შედეგად.“ - განაცხადა ხულორდავამ.