სკანდალი მერიაში - "კალაძე მაღალჩინოსნების საჯარო დაკავებას გეგმავს"

პოლიტიკა - 13:16, 13 Jul, 2017

29812

,,ევროპული საქართველოს" წევრი მამუკა ახვლედიანი "ნიუპოსტთან" სკანდალურ განცხადებას აკეთებს. მისი თქმით, წინასაარჩევნოდ თბილისის მერიის მაღალჩინოსნების დაკავებების სერიაა დაგეგმილი.

ახველდიანი კონკრეტულ სახელებს და გვარებს არ ასახელებს, თუმცა აცხადებს, რომ საუბარია მერიის მაღალჩინოსნებზე, მათ შორის მერის მოადგილეებზე.

"აბესაძე განტევების ვაცია, საქმე გვაქვს მის გადაგდებასთან. უდნა გამოევლინათ ერთ პიროვნება, რომელზეც გადატეხავდნენ ჯოხს. ჩემი ინფორმაციით, კალაძე მერიაში სკანდალით აპირებს მოსვლას. ჩემი ინფორმაციით, დააპატიმრებენ მერიის მაღალჩინოსანს, შეიძლება მერის რომელიმე მოადგილე დააკავონ. ახლა მხოლოდ ამის თქმა შემიძლია, დაველოდოთ მოვლენების განვითარებას"- განაცხადა ახვლედიანმა.

თბილისის მერიის თანამშრომელი ოთარ აბესაძე სუს-მა ქრთამის აღების ბრალდებით დააკავა. მას 3 ათასი დოლარის აღებას ედავებიან.

საქმის მასალების მიხედვით, მიმდინარე წლის მაისში დედაქალაქის მერიის თანამშრომელი ოთარ აბესაძე საქართველოს მოქალაქეებს თბილისში, მდინარე მტკვარზე, ტივზე არსებული კაფეს და შესაბამისი ინფრასტრუქტურის მოწყობისათვის მერიის სხვადასხვა სამსახურიდან საჭირო ნებართვების დაჩქარებული წესით აღებაში დახმარებას დაჰპირდა.

სუს-ის ინფორმაციით, ბრალდებულმა მოქალაქეებს განუმარტა, რომ თბილისის მერიის არქიტექტურის, ქონების და ზედამხედველობის სამსახურებში ყველა საკითხი მასთან შეთანხმებული იყო და ტივის მოსაწყობად საჭირო სამუშაოები შეეძლოთ უპრობლემოდ დაეწყოთ.

ოფიციალური ინფორმაციით, 2017 წლის 11 ივლისს ოთარ აბესაძემ ზემოაღნიშნულ ერთ-ერთ მოქალაქეს ქრთამის სახით მოთხოვნილი თანხა 3000 აშშ დოლარი გამოართვა.

აბესაძეს ბრალის დამტკიცების შემთხვევაში ექვსიდან ცხრა წლამდე თავისუფლების აღკვეთა ემუქრება.