NATO არ აპირებს საქართველოს მომავალზე მოლაპარაკება რუსეთთან აწარმოოს

NATO არ აპირებს საქართველოს მომავალზე მოლაპარაკება რუსეთთან აწარმოოს - ჯეიმს აპატურაი

პოლიტიკა - 13:09, 13 Jul, 2017

6565

ნატო-ს გენერალური მდივნის სპეციალური წარმომადგენელი კავკასიასა და ცენტრალურ აზიაში ჯეიმს აპატურაი „პატრიოტთა ალიანსის“ მიერ გაჟღერებულ ინიციატივას ეხმაურება. აპატურაის თქმით ნატო არ აპირებს საქართველოს მომავალი რუსეთს შეუთანხმოს, რადგან ალიანსში საქართველოს მომავალი მხოლოდ ნატოს და საქართველოს გადასაწყვეტია. აღნიშნული განცხადება აპატურაიმ „მოამბის“ ჟურნალისტთან ქეთევან ქარდავასთან საუბარში გააკეთა:

„მე სიმართლე გითხრათ ვერ ვხვდები კარგად თუ რა მიზანს უნდა ემსახურებოდეს ეს ფორმატი. ჩვენ საქართველოსთან ძალიან ძლიერი თანამშრომლობა გვაქვს და ამავე დროს გვაქვს მცდელობა იმისა, რომ რუსეთთან გვქონდეს კონსტრუქციული დიალოგი, ეს ხდება ნატო-რუსეთის საბჭოს ფორმატში. თუ იდეა არის ის რომ საქართველოს მომავალზე იმსჯელონ ნატომ და რუსეთმა მაშინ ეს შეუძლებელია და არ დგას დღის წესრიგში, ვინაიდან ნატო არ აპირებს საქართველოს მომავალზე მოლაპარაკება აწარმოოს არც რუსეთთან და არც სხვა მესამე მხარესთან. ალიანსში საქართველოს მომავალი ნატოს და საქართველოს გადასაწყვეტია. ჩვენს პარტნიორობაში ვერავინ ჩაერევა. რაც შეეხება რუსეთსა და საქართველოს შორის დიალოგს, დიალოგი მნიშვნელოვანია და არაერთი მიზეზის გამო. ჩვენ არ ვიცით, თუ როდის შეიდზლება ამ დიალოგს ჰქონდეს შედეგი, მეორე - დიალოგით მხარეებს უფრო მეტი ინფორმაცია აქვთ პოზიციების შესახებ, მესამე - ალიანსისთვის მნიშვნელოვანია, რომ თუნდაც მძიმე სიტუაციაში საქართველოს აქვს კონსტრუქციული დიალოგის მცდელობის სურვილი. მე ვსაუბრობ იმ ფორმატებზე, რაც არსებობს, ტარდება ჟენევის მოლაპარაკებები. საქართველომ თავი მარტო არ უნდა იგრძნოს. თქვენ გვერდით არიან პარტნიორები და მეგობრები. კიდევ ერთხელ ვამბობ, რუსეთ-საქართველოს შორის დიალოგი, ის ფორმატები, რაც უკვე არსებობს, სერიოზული პოლიტიკური სიგნალია, სასაუბრო არხი ღიაა და ქმნის იმის შესაძლებლობას, რომ ერთ დღეს შედეგს მივაღწიოთ“- განაცხადა აპატურაიმ.